Кишилик һоқуқни күзүтүш тәшкилати хитайни вәдисигә әмәл қилмиди дәп әйиблиди

Хәлқара кишилик һоқуқни күзүтүш тәшкилати йеқинда доклат елан қилип, хитай һөкүмитиниң хәлқара олимпик комитетиға " ахбарат әркинликигә кәң имканийәт бериш " һәққидә бәргән вәдисигә әмәл қилмиғанлиқини ашкарилиди.

Франсийә агентлиқиниң шәнбә күни бәргән хәвиригә қариғанда, хәлқара кишилик һоқуқ тәшкилатиниң доклатида тәкитлинишичә, хәлқара олимпик комитети 2001 ‏- йили хитай һөкүмитиниң ахбарат әркинликигә капаләт бериш вәдисигә тайинип, бейҗиңгә олимпик мурасимни өткүзүш салаһити бәргән , гәрчә хитай өткән йилниң ахири йеңи қарар лаһийиси мақуллап, чәтәл мухбирлириға зиярәт әркинлики беришни бекиткән болсиму, әмма хитайдики мухбирлар бу әркинликтин бәһримән болалмайдикән.

Мәлуматларға қариғанда, хитайдики бир қисим мухбирлар сақчилар тәрипидин назарәт қилинидикән.

Хәлқара кишилик һоқуқни күзүтүш тәшкилатиниң доклатида көрситилишичә, өткән ай 5 нәпәр мухбир , зораванлиқ һәркәтлирини паш қилиш давамида қолға елинған, мәтбуатни қаттиқ контрол қиливатқан һөкүмәт нәччә миңлиған интернет тор бәтлирини тақиған, бу сәвәблик хәлқара кишилик һоқуқни күзүтүш тәшкилати әгәр келәр йили бейҗиңда олимпик мурасими өткүзүлсә , мухбирларниң әркин зиярәт елип беришиға гуман билән қарайдиғанлиқини билдүрмәктә. (Өмәр қанат)