Rusiye saqchiliri moskwada namayishchilarni tutqun qildi

Rusiye saqchiliri shenbe küni kréml yéqinda prézidént wladimir putinning siyasetlirige qarshi naraziliq namayishi ötküzmekchi bolghan az dégende 170 kishini tutqun qildi. Roytérs agéntliqining moskwadin xewer qilishiche, tutulghanlar arisida dunya shahmat chimpyoni gari kasparof qatarliq nurghun tonulghan siyasiy öktichiler we muxbirlar bar iken.

Xewerlerge qarighanda, rus saqchiliri moskwa sheherlik hökümitining buyruqi bilen namayishchilarning kréml yéqinda yéghilishigha ruxset bermey, ularni aptobuslirigha sélip derhal élip ketken. Rusiye bixeterlik da'irilirining bildürüshiche, moskwa saqchisi namayishchilargha qarshi aldin tedbir alghan bolup, kréml meydanining özidila ming etrapida saqchi xadimi orunlashturghan iken.

Gari kasparofning adwukatining bildürüshiche, rus saqchiliri gari kasparofni, namayishchilar bilen birlikte bolghan hemde hökümetke qarshi shu'ar towlighan dep, tutqun qilghan.

Azadliq radi'osi muxbirlirining moskwadin xewer qilishiche, rusiye saqchiliri qizil meydandiki namayishqa ruxset qilmandin kéyin, 1000 etrapida siyasiy pa'aliyetchi moskwa sheher merkizining yene bir kochisida yighilip, naraziliq herikitini dawamlashturghan. Bu yighilishta söz qilghanlar arisida rusiyining sabiq bash ministiri mixa'il kasyanofmu bar iken. U namayishta qilghan sözide, rusiye hökümiti erkin we adaletlik saylamdin chüchüwatidu dep, körsetken.

Jüme küni, londonda yashawatqan rusiyilik milyarder boris bérizowski, bir gézitigha bergen bayanatida, rusiyide bir inqilab qozghaydighanliqini jakarlighan idi. Lékin xewerlerge qarighanda, shenbe künidiki namayishni teshkilligenler ularning herikitining bérizowskining bayanati bilen héchqandaq munasiwiti yoqliqini bildürgen. (Qanat)