Xitay, rusiye saqchilirining xitay sodigerlirining mallirini musadire qilghanliqigha naraziliq bildürdi

Xitayning rusiyige turushluq bash elchixanisi yéqinda rusiye saqchilirining moskwadiki bir bazardiki winjuwluq xitay sodigerlirining mallirini musadire qilghanliqigha naraziliq bildürdi.

Shinxu'a agéntliqining xewiridin ashkarilinishiche, rusiye saqchiliri 12 - mart küni moskwa shehirining jenubidiki bir bazarda tekshürüsh élip bérish jeryanida, 10 nechche winjuluq ayaq sodigirini etkeschilik qilghan dep eyiblep, ularning mallirini musadire qilghan we etisi bu xitay sodigerlirini tutqan. Rusiye da'iriliri bu xitay sodigerlirining tamozhna resmiyetlirini toluq bijirmigenlikini körsetken.

Xitay da'iriliri bolsa, rusiye we xitay otturisida resmiyleshmigen bezi soda shekilliri bar ikenlikini körsitip, bu tertipke sélinishtin burun, qarshi terep sodigerlirining hoquqigha dexli- terüz yetküzüshke bolmaydighanliqini bildürgen we rusiye saqchilirining bu herikitini " yolsizliq" dep atighan.

Shinxu'a agéntliqining xewiride, tutulghan xitay sodigerlirining qoyup bérilgen- bérilmigenliki tilgha élinmighan. Biraq, rusiye da'irilirining xitay sodigerlirining mallirini qayturup bérishni ret qilip kéliwatqanliqini körsitilgen. (Arzu)