فرانسىيىنىڭ نىس شەھىرىدە پەيشەنبە كۈنى چاقىرىلغان ش ئا ئو ئە ت (شىمالىي ئاتلانتىك ئوكيان ئەھدى تەشكىلاتى NATO) نىڭ مۇداپىئە مىنىستىرلار يىغىنى، ئافغانىستاندىكى ھەربىي قىسىملىرىنى مەزكۇر دۆلەتنىڭ غەربىدىكى رايونلارغا كېڭەيتىشكە قوشۇلدى. ش ئا ئو ئە ت مىنىستىرلار يىغىنى، مەزكۇر قارارنى ش ئا ئو ئە ت دىكى ئامېرىكا قاتارلىق ئۈچ ئىتتىپاقداش دۆلەتنىڭ تەكلىپىگە بويىچە چىقارغان.
بۇ قارار، ش ئا ئو ئە ت نىڭ ئافغانىستاندىكى تىنچلىق ھەرىكىتىنى كېڭەيتىش پىلانىنىڭ بىر قىسىمى بولۇپ، ش ئا ئو ئە ت نىڭ ۋەزىپىسى ئافغانىستاندا تىنچلىقنى قوغداش شۇنداقلا ھامىد كارزاي ھۆكۈمىتىنىڭ تەسىر كۈچىنى باشقا ئۆلكىلەرگە كېڭەيتىشتىن ئىبارەت.
ش ئا ئو ئە ت نىڭ باش كاتىپى شېفىرنىڭ بىلدۈرۈشىچە، مەزكۇر ھەربىي تەشكىلات ئافغانىستانغا ئەۋەتىلىدىغان قىسىملارنى بېكىتىپ بولغان. ئىتتىپاق تەركىۋىدىكى ئىتالىيە، ئىسپانىيە ۋە لېتۋا قاتارلىق دۆلەتلەرنىڭ ھەربىي قىسىملىرى پات ئارىدا غەربىي ئافغانىستانغا ئورۇنلىشىدىكەن.
ھازىر ش ئا ئو ئە ت نىڭ ئافغانىستاندىكى تىنچلىقنى قوغداش قوشۇنىنىڭ تەركىۋىدە ئىككى ئامېرىكا قىسىمى ۋەزىپە ئۆتەۋاتىدۇ. ئامېرىكا ، ش ئا ئو ئە ت نى ئافغانىستاندىن سىرت ئىراقتىمۇ ۋەزىپە ئېلىشقا ئۈندىمەكتە. ش ئا ئو ئە ت نىڭ ئىراق قىسىملىرىنى تەربىيىلەشكە مەيلى باردەك قىلسىمۇ بىراق، تەلىم تەربىيىنىڭ قەيەردە ئېلىپ بېرىلىدىغانلىقىنى مۇزاكىرە قىلىشقا توغرا كېلىدىكەن. (ئەركىن)