Népal dalay lamaning katmandudiki ishxanisini taqidi

Népal hökümiti tibetlerning rohani dahisi dalay lamaning népal paytexti katmandudiki ikki ishxanisini taqighan.

Tibet xewer menbe'elirining ashkarilishiche, népal hökümiti dalay lamaning katmandudiki wekilining ishxanisi bilen tibet muhajirlar parawanliq ishxanisini taqighan. Fransiye axbarat agéntliqining xewer qilishiche, tibet muhajirlar parawanliq ishxanisidiki xadimlar, katmandudiki tibet parawanliq ishxanisi népal ichki ishlar ministirliqining buyruqi boyiche taqalghanliqini bildürgen. Katmandudiki tibet musapirlar parawanliq ishxanisi népaldiki 20 mingdin artuq tibetlikning parawanliq xizmitige mes'ul bolup kelgen.1959 - Yildiki tibet qozghilingidin kéyin jenubiy asiyadiki hindistan, népal qatarliq döletlerge qéchip chiqqan tibet musapirlirining sani 100 mingdin ashqan idi.

Xitayning népaldiki bash elchixanisi yéqinqi yillardin béri, tibetlerning népaldiki musapirlar ishxanilirini taqash toghrisida katmandu hökümitige qattiq bésip ishlitip kelgen. Xitayning ghezipini qozghap qoyushtin ensirigen nepal , béyjing da'irilirining tibetke igilik hoquq yürgüzüshini étirap qilghan.

Fransiye axbarat agéntliqining xewerqilishiche, népal hökümitining yuqiri derijilik bir tashqiy ishlar emeldari, mezkur dölettiki tibet ishxanilirining népal qanunliri boyiche tizimgha élinmighanliqini bildürgen. Katmandudiki tibet musapirlar parawanliq ishxanisi, himalaya taghliridin ötüp dalay lamaning shimali hindistandiki qarargahigha baridighan tibet musapirlar üchün mulazimet qilatti. Népalgha qéchip chiqqan tibetler, b d t musapirlar idarisining tonushturush qeghizige érship, bu yerdin daramsalagha kétetti. . (Erkin)