Кандализа райс: әркин дөләтләр нәшрият әркиниликини чәкләйдиған 5 дөләткә чуқум тәсир көрситиши лазим

Бирләшмә агенитлиқиниң хәвәр қилишичә, америкиниң ташқи ишлар министири кандализа райс әркин дөләтләр нәшрият әркиниликини чәкләйдиған хитай билән русийини өз ичигә алған 5 дөләткә чоқум тәсир көрситиши лазим, дегән.

Америка ташқи ишлар министирлиқиниң баянатчиси сейн микмаркниң ейтишичә, америкиниң ташқи ишлар министири кондализа райс бу сөзни дуня мәтбуат әркинлики күни қилған. У сөзидә наһайити аз сандики кишиләрниң мәнпәәти үчүн журналистларни җисманий җәһәттә һақарәтлигән, қанунни дәпсәндә қилип интернетни чәклигән, мәтбуатларниң йеңи учурлирини қамал қилған дөләтләргә һәрикәт қоллиниш керәкликини; дуняда һәқиқий пакитларни ашкарилаш үчүн өзиниң әркинликидин, һәтта һаятидин айрилишқа писән қилмай пидакарлиқ көрсәткән җурналистларға илһам бериш зөрүрликини тәкитлигән.

Кандализа райс сөзидә хитай, русийиләрдин башқа йәнә зимбабуви, венсуила, вә иранларда нәшрият әркинликиниң дәпсәндә қилиниватқанлиқиға даир әмәлий пакитларни көрсәткән. Кандализа райс сөзидә "һазир дуняда һәр күни батур әзимәтләр вә ханимлар хәтәргә учримақта. Улар пәқәт башқилар үчүн һәқ сөзлигәнлики үчүнла таяқ зәрбисигә учримақта, тутқун қилинмақта, түрмиләргә ташланмақта, һәтта өлтүрүлмәктә. Һазир америка һөкүмити пүтүн йәр шарида нәшрият әркинликиниң қанат йейиши үчүн тиришиватиду. Америка бу җәһәттә башқилар билән һәмкарлиқни күчәйтиду. Әгәр мустәқил мәтбуатлар чирикликни паш қилмиса, җәмийәтниң очуқ- йоруқ болушини илгири сүрмисә, пуқраларни сиясий ишларға арилишишқа риғбәтләндүрмисә, пүтүн җәмийәт хәтәргә йүзлиниду", шуңлашқа әркин дөләтләр чуқум хитай вә русийидәк нәшрият әркинликини чәкләйдиған дөләтләргә тәсир көрситиши лазим" дегән. (Вәли)