Бу йиллиқ нобел тинчлиқ мукапати әл барадәйгә берилди

2005 - Йиллиқ нобел тинчлиқ мукапати б д т ниң хәлқара атом енергийә идариси билән мәзкур идариниң мудири муһәммәд әл барадәйгә берилди. Нобел мукапат җәмийити баянатида әл барадәйни " ядро қоралларниң тарқилишиға қарши туруш вә атом енергийә оргинини күчәйтишкә дадиллиқ билән батурларчә йитәкчилик қилди," дәп тәриплигән.

Әл барадәй нобел тинчлиқ мукапатиға еришкәнликини уққандин кейин, иптихарланғанлиқини билдүрди. У, " мениңчә бу мукапат бүгүн биз дуч келиватқан әң чоң хәтәр - ядро қоралларниң кеңийиш тәһдити икәнликини муәййәнләштүрди," дәйду.

Барадәй, винада мухбирларға нобел мукапатиниң атом енергийә оргиниға йеңи күч беғишлайдиғанлиқини тәкитлигән. У, " мәзкур орган иран вә шималий корийә ядро қораллар мәсилисини бир тәрәп қилиш ишлирида мушуниңға охшаш илһамға муһтаҗ иди " дәп көрсәтти.

Бу йилқи нобел тинчлиқ мукапатиға җәмий 199 киши намзат қилип көрситилгән. Уйғур кишилик һоқуқи вә демократийә һәрикитиниң рәһбири рабийә қадир, тизимликтики әң күчлүк намзатларниң бири, дәп қаралмақта иди. У, җүмә күни әтигәндә голландийә пайтәхти амстердамда мукапатниң әл барадәйға берилгәнликини тәбриклиди. Рабийә қадир, "мән мәйүсләнмәймән, чүнки атом үчүн мукапат бериш пүтүн дуня хәлқиниң тинчлиқи вә тәқдири билән зич мунасивәтлик," дәйду. (Әркин)