Bu yilliq nobél tinchliq mukapati el baradeyge bérildi

• 
  2005-10-07

2005 - Yilliq nobél tinchliq mukapati b d t ning xelq'ara atom énérgiye idarisi bilen mezkur idarining mudiri muhemmed el baradeyge bérildi. Nobél mukapat jem'iyiti bayanatida el baradeyni " yadro qorallarning tarqilishigha qarshi turush we atom énérgiye orginini kücheytishke dadilliq bilen baturlarche yitekchilik qildi," dep teripligen.

El baradey nobél tinchliq mukapatigha érishkenlikini uqqandin kéyin, iptixarlan'ghanliqini bildürdi. U, " méningche bu mukapat bügün biz duch kéliwatqan eng chong xeter - yadro qorallarning kéngiyish tehditi ikenlikini mu'eyyenleshtürdi," deydu.

Baradey, winada muxbirlargha nobél mukapatining atom énérgiye orginigha yéngi küch béghishlaydighanliqini tekitligen. U, " mezkur organ iran we shimaliy koriye yadro qorallar mesilisini bir terep qilish ishlirida mushuninggha oxshash ilhamgha muhtaj idi " dep körsetti.

Bu yilqi nobél tinchliq mukapatigha jem'iy 199 kishi namzat qilip körsitilgen. Uyghur kishilik hoquqi we démokratiye herikitining rehbiri rabiye qadir, tizimliktiki eng küchlük namzatlarning biri, dep qaralmaqta idi. U, jüme küni etigende gollandiye paytexti amstérdamda mukapatning el baradeygha bérilgenlikini tebriklidi. Rabiye qadir, "men meyüslenmeymen, chünki atom üchün mukapat bérish pütün dunya xelqining tinchliqi we teqdiri bilen zich munasiwetlik," deydu. (Erkin)