2012 - يىللىق ئولىمپىك تەنتەربىيە مۇسابىقىسى لوندون شەھىرىدە ئۆتكۈزۈلىدۇ


2005.07.06
Share on WhatsApp
Share on WhatsApp

خەلقئارا ئولىمپىك كومىتېتىنىڭ رەئىسى روگگې، 6 - ئىيۇل چارشەنبە كۈن 2012 - يىللىق ئولىمپىك تەنتەربىيە يىغىنىنىڭ لوندوندا ئۆتكۈزۈلىدىغانلىقىنى ئېلان قىلدى.

ئەنگىلىيە ب ب س رادىئو - تېلېۋىزىيە شىركىتىنىڭ خەۋىرىدە ئېيتىلىشىچە، خەلقئارا ئولىمپىك كومىتېت ئەزالىرىنىڭ بىر قانچە قېتىم بېلەت تاشلىشى نەتىجىسىدە ، لوندون بىلەن پارىژ شەھىرى تەڭ كۆپ ئاۋازغا ئېرىشكەن ، 4 - قېتىملىق بېلەت تاشلاشتا 54 تە 50 ئاۋاز بىلەن لوندون شەھىرى ئۈستۈنلۈككە ئېرىشىپ، ئولىمپىك تەنتەربىيە مۇسابىقىسىنى ئۆتكۈزۈش سالاھىيىتىگە ئېرىشكەن.

خەلقئارا ئولىمپىك تەنتەربىيە كومىتېتىنىڭ رەئىسى روگگې: " ئەسلىدە نامزاتلىققا قويۇلغان بارلىق شەھەرلەر، ئولىمپىك مۇسابىقىسى ئۆتكۈزۈشكە تامامەن لايىق ئىدى، ئەمما بىز پەقەت بىر شەھەرنى تاللاشقا مەجبۇر " دەپ كۆرسەتتى.

موسكۋا، نيۇيورك قاتارلىق شەھەرلەر نامزات قىلىپ كۆرسىتىلگەن بولسىمۇ، 5 چوڭ شەھەردىن كەلگەن مەشھۇر سىياسىيون ۋە تەنتەربىيە مۈتەخەسسىئىسلىرىنىڭ كۆپىنچىسى لوندوندا مەزكۇر مۇسابقىنى ئۆتكۈزۈشنى تەشەببۇس قىلغان.

لوندوندا 1948 - يىلى ئولىمپىك مۇسابىقىسى ئۆتكۈزۈلگەن بولۇپ، ئولىمپىك كومىتېتىنىڭ بۇ قېتىمقى قارارى ئەنگىلىيە خەلقىنى شاتلىققا چۆمدۈردى.

گەرچە بېيجىڭ 2008 - يىللىق ئولىمپىك مۇسابىقىسىنى ئۆتكۈزۈش شەرىپىگە ئېرىشكەن بولسىمۇ، ئەمما بىر قىسىم كىشىلىك ھوقۇق تەشكىلاتلىرى، خىتاي ھۆكۈمىتىنىڭ زەربىسىگە ئۇچرىغان فالوڭگوڭ مۇرىتلىرى شۇنىڭدەك ئۇيغۇر كىشىلىك ھوقۇق پائالىيەتچىلىرى " خىتاي ھۆكۈمىتى كىشىلىك ھوقۇقنى ئەسلىگە كەلتۈرمىگىچە، مەزكۇر مۇسابىقىنى ئۆتكۈزۈشكە لايىق ئەمەس" دەپ نارازىلىق بىلدۈرۈپ كەلمەكتە. (ئەقىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.