ئولىمپىك كومىتېتىنىڭ رەئىسى خىتاينىڭ كىشىلىك ھوقۇق ئەھۋالىغا كۆڭۈل بۆلدى


2006.04.05
Share on WhatsApp
Share on WhatsApp

خەلقئارا ئولىمپىك كومىتېتىنىڭ رەئىسى جەكس روگې 2008‏- يىلىدىكى بېيجىڭ ئولىمپىك يىغىنىنىڭ خىتايدىكى كىشىلىك ھوقۇق ئەھۋالىنىڭ ياخشىلىنىشىغا پايدىلىق بولۇشىنى ئۈمىد قىلىدىغانلىقىنى بىلدۈردى.

جەكس روگې چارشەنبە كورىيەدە خەلقئارا ئولىمپىك كومىتېتىنىڭ يۇقىرى دەرىجىلىك ئەمەلدار لار يىغىنىدا بۇ قاراشلىرىنى ئوتتۇرىغا قويغان بولۇپ، ئۇ 2008‏- يىلدىكى بېيجىڭ ئولىمپىك يىغىنىنىڭ تەييارلىق خىزمەتلىرى ئۈستىدىن چىقىرىلىدىغان دوكلاتنىڭ ئاكتىپ چىقىشىنى ئۈمىد قىلىدىغانلىقىنى، لېكىن ئۆزىنىڭ يەنىلا خىتايدىكى مۇھىت بۇلغىنىشى ۋە كىشىلىك ھوقۇق ئەھۋالىغا كۆڭۈل بولىدىغانلىقىنى بىلدۈرگەن.

روگې سۆزىدە، خەلقئارا ئولىمپىك كومىتېتىنىڭ مەخسۇس ئورگانلار ۋە مۇناسىۋەتلىك ھۆكۈمەتسىز تەشكىلاتلارنىڭ بۇ ھەقتىكى پىكىرلىرىنى تىڭشىغانلىقىنى تەكىتلەپ، " مەن ئىشىنىمەنكى، ئولىمپىك يىغىنىنىڭ بېيجىڭدا ئېچىلىشى، خىتاينىڭ ئەركىنلىكى ۋە جەمئىيەت مۇناسىۋىتىنىڭ ياخشىلىنىشىغا تەسىر كۆرسىتىدۇ" دېدى.

ئۇ يەنە، بېيجىڭ ئولىمپىك يىغىنىغا 25 مىڭ مۇخبىرنىڭ قاتنىشىشىنىڭ، خىتاينىڭ پۈتۈن دۇنياغا ئېچىۋېتىلىشىگە تۈرتكە بولىدىغانلىقىنى ئېيتتى. شۇنداقلا ئۇ يەنە، خىتاي دائىرىلىرىنىڭ بېيجىڭ شەھەر مۇھىتىنىڭ ياخشىنىلىشى ئۈچۈن تىرىشىۋاتقانلىقىنىمۇ ئەسكەرتتى.

خىتاي ھۆكۈمىتى ئولىمپىك زاللىرىنى سېلىش ئۈچۈن نۇرغۇن تۈركۈمدىكى ئاھالىلەرنى مەجبۇرىي كۆچۈرگەنلىكى سەۋەبىدىن، ئاھالىلەرنىڭ نارازىلىق كەيپىياتلىرى يۇقىرى كۆتۈرۈلگەن ھەمدە خىتاي ھۆكۈمىتى شۇ سەۋەبتىن خەلقئارالىق كىشىلىك ھوقۇق تەشكىلاتلىرىنىڭ ئەيىبلىشىگە ئۇچرىغان ئىدى. (پەرىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.