Олимпик комитетиниң рәиси хитайниң кишилик һоқуқ әһвалиға көңүл бөлди

Хәлқара олимпик комитетиниң рәиси җәкс роге 2008‏- йилидики бейҗиң олимпик йиғининиң хитайдики кишилик һоқуқ әһвалиниң яхшилинишиға пайдилиқ болушини үмид қилидиғанлиқини билдүрди.

Җәкс роге чаршәнбә корийәдә хәлқара олимпик комитетиниң юқири дәриҗилик әмәлдар лар йиғинида бу қарашлирини оттуриға қойған болуп, у 2008‏- йилдики бейҗиң олимпик йиғининиң тәйярлиқ хизмәтлири үстидин чиқирилидиған доклатниң актип чиқишини үмид қилидиғанлиқини, лекин өзиниң йәнила хитайдики муһит булғиниши вә кишилик һоқуқ әһвалиға көңүл болидиғанлиқини билдүргән.

Роге сөзидә, хәлқара олимпик комитетиниң мәхсус органлар вә мунасивәтлик һөкүмәтсиз тәшкилатларниң бу һәқтики пикирлирини тиңшиғанлиқини тәкитләп, " мән ишинимәнки, олимпик йиғининиң бейҗиңда ечилиши, хитайниң әркинлики вә җәмийәт мунасивитиниң яхшилинишиға тәсир көрситиду" деди.

У йәнә, бейҗиң олимпик йиғиниға 25 миң мухбирниң қатнишишиниң, хитайниң пүтүн дуняға ечиветилишигә түрткә болидиғанлиқини ейтти. Шундақла у йәнә, хитай даирилириниң бейҗиң шәһәр муһитиниң яхшинилиши үчүн тиришиватқанлиқиниму әскәртти.

Хитай һөкүмити олимпик заллирини селиш үчүн нурғун түркүмдики аһалиләрни мәҗбурий көчүргәнлики сәвәбидин, аһалиләрниң наразилиқ кәйпиятлири юқири көтүрүлгән һәмдә хитай һөкүмити шу сәвәбтин хәлқаралиқ кишилик һоқуқ тәшкилатлириниң әйиблишигә учриған иди. (Пәридә)