Olimpik komitétining re'isi xitayning kishilik hoquq ehwaligha köngül böldi


2006.04.05

Xelq'ara olimpik komitétining re'isi jeks rogé 2008‏- yilidiki béyjing olimpik yighinining xitaydiki kishilik hoquq ehwalining yaxshilinishigha paydiliq bolushini ümid qilidighanliqini bildürdi.

Jeks rogé charshenbe koriyede xelq'ara olimpik komitétining yuqiri derijilik emeldar lar yighinida bu qarashlirini otturigha qoyghan bolup, u 2008‏- yildiki béyjing olimpik yighinining teyyarliq xizmetliri üstidin chiqirilidighan doklatning aktip chiqishini ümid qilidighanliqini, lékin özining yenila xitaydiki muhit bulghinishi we kishilik hoquq ehwaligha köngül bolidighanliqini bildürgen.

Rogé sözide, xelq'ara olimpik komitétining mexsus organlar we munasiwetlik hökümetsiz teshkilatlarning bu heqtiki pikirlirini tingshighanliqini tekitlep, " men ishinimenki, olimpik yighinining béyjingda échilishi, xitayning erkinliki we jem'iyet munasiwitining yaxshilinishigha tesir körsitidu" dédi.

U yene, béyjing olimpik yighinigha 25 ming muxbirning qatnishishining, xitayning pütün dunyagha échiwétilishige türtke bolidighanliqini éytti. Shundaqla u yene, xitay da'irilirining béyjing sheher muhitining yaxshinilishi üchün tirishiwatqanliqinimu eskertti.

Xitay hökümiti olimpik zallirini sélish üchün nurghun türkümdiki ahalilerni mejburiy köchürgenliki sewebidin, ahalilerning naraziliq keypiyatliri yuqiri kötürülgen hemde xitay hökümiti shu sewebtin xelq'araliq kishilik hoquq teshkilatlirining eyiblishige uchrighan idi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.