Ch m t muxbirlarning Uyghur we tibetni ziyaret qilish - qilalmasliqigha éniqlima bérishni telep qildi

Xitay tashqiy ishlar ministirliki ötken ayda tibetni ziyaret qilghan ikki gherblik muxbirni agahlandurghandin kéyin, chégrisiz muxbirlar teshkilati jüme küni bayanat élan qilip, béyjing olimpik komitéti mes'uli lyu chidin chet'el muxbirliri olimpik jeryanida xitayning her qandaq yérige yérip, her qandaq kishini ziyaret qilsa bolidu, dégen belgilimining Uyghur ili we tibetni öz ichige alidighan yaki almaydighanliqigha éniqlima bérishni telep qildi.

Merkizi parizhdiki muxbirlarni qoghdighuchi bu teshkilatning bayanatta eskertishiche, béyjing olimpik komitéti téxi yéqindila chet'ellik muxbirlarning ziyaret hoquqigha da'ir tepsili doklat élan qilghan bolsimu, lékin tibetni ziyaret qilghan muxbirlarning ighwagerchilikke uchrighanliqidin heyran qalghan.

Bayanatta,"biz lyu chini otturigha chiqip chet'ellik muxbirlar tibet we shinjanggha bérip ziyaret qilsa, ighwagerchilikke uchrimaydighanliqini we buni qollaydighanliqini ashkare élan qilishqa shundaqla da'irilerdin ighwagerchilikni toxtutushni telep qilishqa chaqirimiz,"deydu.

Xewerlerge qarighanda bir amérika muxbiri bilen yene bir gérmaniyilik muxbir, bu yil 4 - ayda tibetni ziyaret qilghandin kéyin, 5 - ayning 15 - küni xitay tashqiy ishlar ministirliki teripidin soraq qilin'ghan shundaqla tibettin xewer bérishning xata ikenliki, xaraktérining éghir we xewerde heqiqi ehwalning burmilan'ghanliqini agahlandurup, " xataliqini tüzütish"ni telep qilghan.

Xitay da'iriliri buningdin burun élan qilghan yéngi axbarat belgilimiside, chet'ellik muxbirlarning olimpik jeryanida xitaydiki her qandaq yerge barsa we herqandaq kishi bilen söhbet ötküzse bolidighanliqini jakarlighan idi. (Erkin)