Д у қ хитай җамаәт хәвпсизлик министирлиқиниң чақириқиға қарши баянат елан қилди


2007.09.06

Дуня уйғур қурултийиниң баянатчиси дилшат ришит хитай җамаәт хәвпсизлик министирлиқиниң, компартийиниң 17 ‏- нөвәтлик қурултийи мәзгилидә бихәтәрликкә капаләтлик қилиш һәққидики чақириқиға қарши баянат елан қилип, хитай һөкүмити әндишә қиливатқан муқимсизлиқниң һөкүмәтниң сиясити түпәйли мәйданға келиватқанлиқини билдүрди.

Хитай хәвәр агентлиқиниң пәйшәнбә күни бәргән хәвиридин мәлум болушичә, хитай җамаәт хәвпсизлик министирлиқи 17 ‏- нөвәтлик қурултайниң бихәтәр ечилишиға капаләтлик қилиш үчүн мәхсус йиғин чақирған, йиғинда һәр дәриҗилик җамаәт хәвпсизлик органлириниң сиясий һушярлиқни ашуруп, ху җинтав рәһбәрлик қиливатқан мәркизи һөкүмәт билән бирдәкликни сақлаш, сиясий нуқтидин мәйданға кәлгән мәсилиләрни бир тәрәп қилишқа маһир болуш шуниңдәк дөләтниң һакимийитини қоғдаш тәшәббүс қилинған һәмдә армийә , сақчи қисимлириға қоюлған тәләпни күчәйтип, қаттиқ интизам, қаттиқ башқуруш, қаттиқ назарәт қилиш чарилири билән 17 ‏- қурултайниң ғәлибилик аяғлишишиға хизмәт көрситиш тәкитләнгән.

Дуня уйғур қурултийиниң баянатчиси дилшат ришитниң билдүрүшичә, хитай даирилириниң һәр даим қурултай мәзгилидә бихәтәрликни күчәйтиш һәққидә чақириқ чиқириши, һөкүмәтниң пуқраларға болған әндишисиниң ипадиси болуп, хәлқниң наразилиқидин қорққан хитай һөкүмити , демократик әлләрдә әқәллий һоқуқ һесабланған кишиләрниң " намайиш қилиш " һоқуқиниму қаттиқ бастурмақта.

Дилшат ришит сөзидә йәнә, уйғурларниң кишилик һоқуқиниң әң қаттиқ дәпсәндә болуватқанлиқини тәкитләп, хитай даирилириниң уйғурларниң маарипини йоқ қилиш, ишсизларни ишқа орунлаштуруш баһанисида қизларни хитай өлкилиригә йөткәш, диний әркинликтин мәһрум қалдуруш, изчил көчмән йөткәш қилмишлиридин демократик әлләр вә хәлқара кишилик һоқуқ тәшкилатлириниң толуқ хәвәрдар болғанлиқини, шуңа хитайниң " олимпик" мурасимиға саһипханлиқ қилишқиму лайиқ әмәслики дуняниң һәммила йеридә тилға елиниватқанлиқини оттуриға қойди. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.