D u q xitay jama'et xewpsizlik ministirliqining chaqiriqigha qarshi bayanat élan qildi

Dunya Uyghur qurultiyining bayanatchisi dilshat rishit xitay jama'et xewpsizlik ministirliqining, kompartiyining 17 ‏- nöwetlik qurultiyi mezgilide bixeterlikke kapaletlik qilish heqqidiki chaqiriqigha qarshi bayanat élan qilip, xitay hökümiti endishe qiliwatqan muqimsizliqning hökümetning siyasiti tüpeyli meydan'gha kéliwatqanliqini bildürdi.

Xitay xewer agéntliqining peyshenbe küni bergen xewiridin melum bolushiche, xitay jama'et xewpsizlik ministirliqi 17 ‏- nöwetlik qurultayning bixeter échilishigha kapaletlik qilish üchün mexsus yighin chaqirghan, yighinda her derijilik jama'et xewpsizlik organlirining siyasiy hushyarliqni ashurup, xu jintaw rehberlik qiliwatqan merkizi hökümet bilen birdeklikni saqlash, siyasiy nuqtidin meydan'gha kelgen mesililerni bir terep qilishqa mahir bolush shuningdek döletning hakimiyitini qoghdash teshebbüs qilin'ghan hemde armiye , saqchi qisimlirigha qoyulghan telepni kücheytip, qattiq intizam, qattiq bashqurush, qattiq nazaret qilish chariliri bilen 17 ‏- qurultayning ghelibilik ayaghlishishigha xizmet körsitish tekitlen'gen.

Dunya Uyghur qurultiyining bayanatchisi dilshat rishitning bildürüshiche, xitay da'irilirining her da'im qurultay mezgilide bixeterlikni kücheytish heqqide chaqiriq chiqirishi, hökümetning puqralargha bolghan endishisining ipadisi bolup, xelqning naraziliqidin qorqqan xitay hökümiti , démokratik ellerde eqelliy hoquq hésablan'ghan kishilerning " namayish qilish " hoquqinimu qattiq basturmaqta.

Dilshat rishit sözide yene, Uyghurlarning kishilik hoquqining eng qattiq depsende boluwatqanliqini tekitlep, xitay da'irilirining Uyghurlarning ma'aripini yoq qilish, ishsizlarni ishqa orunlashturush bahanisida qizlarni xitay ölkilirige yötkesh, diniy erkinliktin mehrum qaldurush, izchil köchmen yötkesh qilmishliridin démokratik eller we xelq'ara kishilik hoquq teshkilatlirining toluq xewerdar bolghanliqini, shunga xitayning " olimpik" murasimigha sahipxanliq qilishqimu layiq emesliki dunyaning hemmila yéride tilgha éliniwatqanliqini otturigha qoydi. (Eqide)