Xitayning olimpik harpisidimu kishilik hoquqni dawamliq depsende qiliwatqanliqi ashkarilanmaqta

Xelq'aradiki bir qanche teshkilatlar peyshenbe küni, birdek halda xitayning izchil türde "olimpik " heqqide bergen wedisige xilap heriketlerni sadir qiliwatqanliqini bildürdi.

Merkizi jenwediki xelq'ara puqralar yer - zémin hoquqini qoghdash merkizi, xitayning " olimpik " ötküzüsh bahaniside her ayda 13 ming kishini béyjingdin chiqip kétishke mejburlawatqanliqini, bu heriketning xelq'ara qanun'gha qet'iy uyghun kelmeydighanliqini tekitlidi.

Mezkür teshkilatning bildürüshiche, xitay 2007 ‏- yili kishilerning makanlishish hoquqigha eng éghir dexli yetküzgen dölet bolup, béyjing qanunsiz halda zor kölemlik ahale köchürüsh herikiti qozghash arqiliq iqtisadni tereqqi qildurush wastisini yolgha qoymaqta.

Bu arida yene, amérikidiki muxbirlarni qoghdash teshkilati doklat élan qilip, xitayning 9 yildin buyan dunya buyiche muxbirlarni eng köp türmige tashlighan dölet ikenlikini ashkarilidi.

Muxbirlarni qoghdash teshkilatining bildürüshiche, xitay héchqachan " olimpik" ötküzülüshtin burun, axbarat erkinlikini yaxshilash heqqide bergen wediside turmighan bolup, 9 yildin buyan muxbirlarni jazalash qilmishi éghir 24 dölet ichide birinchi orunni igilep kelgen.

Mezkür teshkilat yene, xitayda jazalan'ghan muxbirlarning 57 pirsenti, hökümetke qarshi yeni dölet hakimiyitini aghdurushqa urun'ghan, dölet mexpiyetlikini ashkarilighan, dölet menpe'etige dexli yetküzgen dégen jinayetler bilen eyiblen'genlikini bildürdi.

"Olimpik" harpisida xitayda izchil türde yüz bériwatqan kishilik hoquq depsendichilikliri, xelq'ara kishilik hoquq teshkilatlirining " olimpik" ni bayqut qilish pa'aliyiti üchün yéterlik asas yaritip bergen bolsimu, xelq'ara " olimpik" komtéti bu mesile üstide éniq ipade bildürmey kelmekte. Shunga közetküchiler eger " olimpik " xitaydek bir dölette ötküzülse uning obrazining éghir derijide xunuklishidighanliqini ipadilimekte. (Eqide)