Хәлқара кәчүрүм тәшкилати хитайни өлүм җазаси һәққидики ислаһатини тезлитишкә чақирди

Баш штаби лондондики хәлқара кәчүрүм тәшкилати хитайниң өлүм җазасиға мунасивәтлик қанун түзүмлирини ислаһ қилишни тезлитишкә чақирди.

Хәлқара кәчүрүм тәшкилати пәйшәнбә күни баянат елан қилип, хитайниң өлүм җазасини қайта тәкшүрүп бекитиш һоқуқини мәркизий алий сот мәһкимисигә өткүзүп бәрмәкчи болғанлиқини қарши алди. Әмма мәркүз тәшкилат, бу тәдбирниң өлүм җазаси бериш җәряниниң хәлқара кишилик һоқуқ өлчәмлиригә уйғун килишигә капаләтлик қилидиғанлиқидин дерәк бәрмәйдиғанлиқини көрсәтти.

Хитай алий хәлқ сот мәһкимиси өткән айда, мәхсус өлүм җазасини қайта тәкшүрүп бикитиш ишлирини бир тәрәп қилидиған үч җинайи ишлар сотини тәсис қилидиғанлиқини билдүргән вә бу арқилиқ хата кесилишниң алдини алидиғанлиқини көрсәткән иди.

Хәлқара кәчүрүм тәшкилати баянатида, "бу тәдбир йитәрлик әмәс. Хитай чоқум башқа қошумчә тәдбирләрниму елиши керәк. Мәсилән , өлүм җазаси һәққидики учурларни ашкарилаш, өлүм җазаси берилидиған җинайәт түрлирини азайтиш қатарлиқлар" дәп билдүрди.

Хитайда өлүм җазаси берилидиғанларниң сани йәнила дөләт мәхпийәтлики һесаблиниду. Хитай адәттә уйғур ели вә тибәттила сиясий вә диний мәһбусларға өлүм җазаси бериду.

Хәлқара кәчүрүм тәшкилатиниң ашкарилишичә, хитайда өлүм җазаси берилгәнләрниң сани дуняниң башқаҗайлирида өлүм җазаси берилгәнләр саниниң йиғиндисидинму көп. (Арзу)