Xelq'ara kechürüm teshkilati xitayni ölüm jazasi heqqidiki islahatini tézlitishke chaqirdi

Bash shtabi londondiki xelq'ara kechürüm teshkilati xitayning ölüm jazasigha munasiwetlik qanun tüzümlirini islah qilishni tézlitishke chaqirdi.

Xelq'ara kechürüm teshkilati peyshenbe küni bayanat élan qilip, xitayning ölüm jazasini qayta tekshürüp békitish hoquqini merkiziy aliy sot mehkimisige ötküzüp bermekchi bolghanliqini qarshi aldi. Emma merküz teshkilat, bu tedbirning ölüm jazasi bérish jeryanining xelq'ara kishilik hoquq ölchemlirige uyghun kilishige kapaletlik qilidighanliqidin dérek bermeydighanliqini körsetti.

Xitay aliy xelq sot mehkimisi ötken ayda, mexsus ölüm jazasini qayta tekshürüp bikitish ishlirini bir terep qilidighan üch jinayi ishlar sotini tesis qilidighanliqini bildürgen we bu arqiliq xata késilishning aldini alidighanliqini körsetken idi.

Xelq'ara kechürüm teshkilati bayanatida, "bu tedbir yiterlik emes. Xitay choqum bashqa qoshumche tedbirlernimu élishi kérek. Mesilen , ölüm jazasi heqqidiki uchurlarni ashkarilash, ölüm jazasi bérilidighan jinayet türlirini azaytish qatarliqlar" dep bildürdi.

Xitayda ölüm jazasi bérilidighanlarning sani yenila dölet mexpiyetliki hésablinidu. Xitay adette Uyghur éli we tibettila siyasiy we diniy mehbuslargha ölüm jazasi béridu.

Xelq'ara kechürüm teshkilatining ashkarilishiche, xitayda ölüm jazasi bérilgenlerning sani dunyaning bashqajaylirida ölüm jazasi bérilgenler sanining yighindisidinmu köp. (Arzu)