خۇ جىنتاۋ شۋېتسىيە زىيارىتىدە ئۆلۈم جازاسى مەسىلىسىدە بېسىمغا دۇچ كېلىشى مۈمكىن


2007.06.08
Share on WhatsApp
Share on WhatsApp

خىتاي دۆلەت رەئىسى خۇ جىنتاۋ گېرمانىيىدە چاقىرىلغان 8 دۆلەت گۇرۇھىنىڭ باشلىقلار يىغىنىغا كۆزەتكۈچى سۈپىتىدە قاتناشقاندىن كېيىن، جۈمە كۈنى شىمالىي ياۋروپادىكى ئەڭ دېموكراتىك دۆلەتلەرنىڭ بىرى شىۋېتسىيىدە ئېلىپ بارىدىغان زىيارىتىنى باشلىدى. شۋېتسىيە تاشقى ئىشلار مىنىستىرىنىڭ بىرلەشمە ئاخبارات ئاگېنتلىقىغا ئەسكەرتىشىچە، شۋېتسىيە خۇ جىنتاۋنىڭ زىيارىتى جەريانىدا خىتاي كىشىلىك ھوقۇقى خاتىرىسىنى يۈز خاتىرە قىلمايلا تەنقىد قىلماقچى، بولۇپمۇ خىتاينىڭ ئۆلۈم جازاسىنى كەڭ - كۆلەمدە ئىجرا قىلىش سىياسىتىنى تەنقىد قىلماقچى ئىكەن.

خىتاي دۇنيا بويىچە ئۆلۈم جازاسىنى ئەڭ كۆپ ئىجرا قىلىدىغان دۆلەت سۈپىتىدە، بولۇپمۇ ئۇيغۇر ئاپتونوم رايونىدا سىياسىي مەھبۇسلار ۋە شەرقىي تۈركىستان مۇستەقىلچى زاتلىرىغا ئۆلۈم جازاسى بېرىدىغان دۆلەت سۈپىتىدە خەلقئارا كىشىلىك ھوقۇقنى قوغدىغۇچى ئورگانلارنىڭ ئەيىبلىشىگە ئۇچرىماقتا ئىدى.

لېكىن، خىتاي ھۆكۈمىتى ئۆلۈم جازاسىنى "جانغا - جان ئېلىش خەنزۇ خەلقىنىڭ مەدەنىيەت خاراكتېرىگە ئۇيغۇن كېلىدىغان تارىخىي ئەنئەنە،" دەپ ئاقلىماقتا. شۋېتسىيە تاشقى ئىشلار مىنىستىرى كارل بىلدت، خىتاي بىلەن شۋېتسىيىنىڭ ئۆلۈم جازاسىغا تۇتقان پوزىتسىيىسى ۋە كۆز قارىشىدا زور پەرقلەر بارلىقىنى ئەسكەرتىپ، "بىز چوقۇم بىزنىڭ قارىشىمىزنى ئوتتۇرىغا قويىمىز ۋە بىز ئىزچىل تۈردە شۇنداق قىلىپ كېلىۋاتىمىز، " دېدى.

بىرلەشمە ئاخبارات ئاگېنتلىقىنىڭ ئەسكەرتىشىچە، بۇ قېتىمقى زىيارەت خۇ جىنتاۋنىڭ شۋېتسىيىنى تۇنجى قېتىم زىيارەت قىلىشى ئىكەن. شۇ كۈنى خەلقئارا كەچۈرۈم تەشكىلاتىنىڭ شۋېتسىيە شۆبىسى، شۋېتسىيە ئۇيغۇر كومىتېتى قاتارلىق ئورگانلار خۇ جىنتاۋغا قارشى كىچىك كۆلەملىك نامايىش ئۇيۇشتۇرغان. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.