Ху җинтав шветсийә зияритидә өлүм җазаси мәсилисидә бесимға дуч келиши мүмкин


2007.06.08
Share on WhatsApp
Share on WhatsApp

Хитай дөләт рәиси ху җинтав германийидә чақирилған 8 дөләт гуруһиниң башлиқлар йиғиниға көзәткүчи сүпитидә қатнашқандин кейин, җүмә күни шималий явропадики әң демократик дөләтләрниң бири шиветсийидә елип баридиған зияритини башлиди. Шветсийә ташқи ишлар министириниң бирләшмә ахбарат агентлиқиға әскәртишичә, шветсийә ху җинтавниң зиярити җәрянида хитай кишилик һоқуқи хатирисини йүз хатирә қилмайла тәнқид қилмақчи, болупму хитайниң өлүм җазасини кәң - көләмдә иҗра қилиш сияситини тәнқид қилмақчи икән.

Хитай дуня бойичә өлүм җазасини әң көп иҗра қилидиған дөләт сүпитидә, болупму уйғур аптоном районида сиясий мәһбуслар вә шәрқий түркистан мустәқилчи затлириға өлүм җазаси беридиған дөләт сүпитидә хәлқара кишилик һоқуқни қоғдиғучи органларниң әйиблишигә учримақта иди.

Лекин, хитай һөкүмити өлүм җазасини "җанға - җан елиш хәнзу хәлқиниң мәдәнийәт характеригә уйғун келидиған тарихий әнәнә," дәп ақлимақта. Шветсийә ташқи ишлар министири карл билдт, хитай билән шветсийиниң өлүм җазасиға тутқан позитсийиси вә көз қаришида зор пәрқләр барлиқини әскәртип, "биз чоқум бизниң қаришимизни оттуриға қойимиз вә биз изчил түрдә шундақ қилип келиватимиз, " деди.

Бирләшмә ахбарат агентлиқиниң әскәртишичә, бу қетимқи зиярәт ху җинтавниң шветсийини тунҗи қетим зиярәт қилиши икән. Шу күни хәлқара кәчүрүм тәшкилатиниң шветсийә шөбиси, шветсийә уйғур комитети қатарлиқ органлар ху җинтавға қарши кичик көләмлик намайиш уюштурған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.