Xu jintaw shwétsiye ziyaritide ölüm jazasi mesiliside bésimgha duch kélishi mümkin


2007.06.08

Xitay dölet re'isi xu jintaw gérmaniyide chaqirilghan 8 dölet guruhining bashliqlar yighinigha közetküchi süpitide qatnashqandin kéyin, jüme küni shimaliy yawropadiki eng démokratik döletlerning biri shiwétsiyide élip baridighan ziyaritini bashlidi. Shwétsiye tashqi ishlar ministirining birleshme axbarat agéntliqigha eskertishiche, shwétsiye xu jintawning ziyariti jeryanida xitay kishilik hoquqi xatirisini yüz xatire qilmayla tenqid qilmaqchi, bolupmu xitayning ölüm jazasini keng - kölemde ijra qilish siyasitini tenqid qilmaqchi iken.

Xitay dunya boyiche ölüm jazasini eng köp ijra qilidighan dölet süpitide, bolupmu Uyghur aptonom rayonida siyasiy mehbuslar we sherqiy türkistan musteqilchi zatlirigha ölüm jazasi béridighan dölet süpitide xelq'ara kishilik hoquqni qoghdighuchi organlarning eyiblishige uchrimaqta idi.

Lékin, xitay hökümiti ölüm jazasini "jan'gha - jan élish xenzu xelqining medeniyet xaraktérige uyghun kélidighan tarixiy en'ene," dep aqlimaqta. Shwétsiye tashqi ishlar ministiri karl bildt, xitay bilen shwétsiyining ölüm jazasigha tutqan pozitsiyisi we köz qarishida zor perqler barliqini eskertip, "biz choqum bizning qarishimizni otturigha qoyimiz we biz izchil türde shundaq qilip kéliwatimiz, " dédi.

Birleshme axbarat agéntliqining eskertishiche, bu qétimqi ziyaret xu jintawning shwétsiyini tunji qétim ziyaret qilishi iken. Shu küni xelq'ara kechürüm teshkilatining shwétsiye shöbisi, shwétsiye Uyghur komitéti qatarliq organlar xu jintawgha qarshi kichik kölemlik namayish uyushturghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.