Ezerbeyjanning baku shehiridiki bir soda bazirigha ot ketti

Ezerbeyjan paytexti baku shehirining 30 k m sirtidiki bir top tarqitish bazirigha jüme küni ot ketti. Xewerlerde ashkarilishiche, weqede bir qisim xitay tijaretchilerning dukanlirini öz ichige alghan mingdin artuq dukan köyüp ketken.

Ezerbeyjandiki Uyghur tijaretchilerdin igilishimizche, ot apiti bakudiki "bina soda baziri" da yüz bergen. Xongkong metbu'atliri, weqedin kéyin ezerbeyjanda turushluq xitay elchixanisidiki xadimlarning neq meydan'gha bérip, xitay tijaretchilerdin hal sorighanliqini bildürdi. Xongkongdiki xitayche chiqidighan "mingbaw" gézitining xewer qilishiche, weqede bir xitay tijaretchining dukini ziyan'gha uchrighan shundaqla xitay elchixanisidikiler bakudiki xitay tijaretchilerni mal - mülki we kishilik bixeterlikige diqqet qilish heqqide agahlandurup, her qandaq qiyinchiliqqa uchrisa derhal elchixanigha xewer qilishni tapilighan.

Bakuda turghan Uyghur tijaretchiler, ot apitide biwaste ziyan'gha uchrighan Uyghurlar bolmisimu biraq, "bina top tarqitish baziri" diki ezerbayjanliq dukandarlargha nésige mal bergen Uyghur tijaretchilerning barliqini bildürdi.

Bakudiki weqe ottura asiya we kawkaziye rayonida yéqinqi 3 yil ichide yüz bergen soda baziridiki 2 - chong ot apiti bolup hésablinidu. 2002 - Yili 2 - ayning 14 - küni qirghizistanning béshkek shehiride torbazidiki bazargha ot kétip, bazardiki Uyghurlarning nechche yüz dukini pütünley weyran bolghan. Qirghizistan hökümiti ot apitining éléktir simidin kélip chiqqanliqini élan qilghan idi. Béshkektiki xitay elchixanisi eyni chaghda Uyghur tijaretchilerni ghawgha chiqarmasliq toghrisida agahlandurghan. (Erkin)