ئامېرىكا ئوتتۇرا شەرق ئىتتىپاقداش دۆلەتلىرىگە ھەربىي ياردەمنى كۈچەيتىدىغانلىقىنى بىلدۈرمەكتە

ئامېرىكا دائىرىلىرى ئوتتۇرا شەرقتىكى ئىتتىپاقداش دۆلەتلەرنى زور مىقداردا ھەربىي ياردەم بىلەن تەمىنلەش ئارقىلىق، ئىران كېڭەيمىچىلىكىگە تاقابىل تۇرۇش ئىستراتېگىيىسىنى بەلگىلىدى.

ئامېرىكا تاشقى ئىشلار مىنىستىرى كاندىلىزا رايىس دۈشەنبە كۈنى 10 يىل ئىچىدە مىسىرغا 13 مىليارد ئامېرىكا دوللارلىق ھەربىي قورال سېتىپ بېرىدىغانلىقىنى، ئوخشاشلا ئىسرائىلىيىگىمۇ 10 يىل ئىچىدە 30 مىليارد دوللارلىق ھەربىي قورال سېتىپ بېرىدىغانلىقىنى بىلدۈردى.

كاندىلىزا رايىس دۈشەنبە كۈنى ئامېرىكىنىڭ دۆلەت مۇداپىئە مىنىستىرى گېيتىس بىلەن بىرگە ، ئوتتۇرا شەرقنىڭ مۇقىملىقى ۋە ئىراقنىڭ ۋەزىيىتىنى ياخشىلاش مەقسىتىدە ۋاشىنگتوندىن ئايرىلىپ، پارىس قولتۇقىدىكى 5 دۆلەتكە قاراتقان زىيارىتىنى باشلىۋەتتى.

بۇ ئارىدا ئامېرىكا ھۆكۈمەت خادىملىرى يەنە، ئامېرىكىنىڭ سەئۇدى ئەرەبىستان ۋە پارىس قولتۇقىدىكى ئەرەب دۆلەتلىرىگە 20 مىليارد دوللار قىممىتىدە قورال سېتىپ بېرىشنى پىلان قىلىۋاتقانلىقىنى ئاشكارىلىدى.

كاندىلىزا رايىس ئوتتۇرا شەرقتىكى زىيارىتىنى باشلاشتىن بۇرۇن، ئىرلاندىيە جۇمھۇرىيىتىدە مۇخبىرلارغا " : شەك - شۈبھىسىزكى ، ئىران ئامېرىكا ۋە ئوتتۇرا شەرق دۆلەتلىرىنىڭ مەنپەئەتىدىكى بىر چوڭ تەھدىت ھېسابلىنىدۇ "دېدى.

مۇتەخەسسىسلەرنىڭ بىلدۈرۈشىچە، ئامېرىكىنىڭ ئوتتۇرا شەرق دۆلەتلىرىگە ھەربىي ياردەم كۆرسىتىشى، ئىران كېڭەيمىچىلىكى ۋە بۇنىڭدىن كېيىن مەيدانغا كېلىدىغان زوراۋانلىق ھەرىكەتلىرىنىڭ ئالدىنى ئېلىشنى مەقسەت قىلىدىكەن. (ئەقىدە)