Америка оттура шәрқ иттипақдаш дөләтлиригә һәрбий ярдәмни күчәйтидиғанлиқини билдүрмәктә


2007.07.31
Share on WhatsApp
Share on WhatsApp

Америка даирилири оттура шәрқтики иттипақдаш дөләтләрни зор миқдарда һәрбий ярдәм билән тәминләш арқилиқ, иран кеңәймичиликигә тақабил туруш истратегийисини бәлгилиди.

Америка ташқи ишлар министири кандилиза райис дүшәнбә күни 10 йил ичидә мисирға 13 милярд америка долларлиқ һәрбий қорал сетип беридиғанлиқини, охшашла исраилийигиму 10 йил ичидә 30 милярд долларлиқ һәрбий қорал сетип беридиғанлиқини билдүрди.

Кандилиза райис дүшәнбә күни америкиниң дөләт мудапиә министири гейтис билән биргә , оттура шәрқниң муқимлиқи вә ирақниң вәзийитини яхшилаш мәқситидә вашингтондин айрилип, парис қолтуқидики 5 дөләткә қаратқан зияритини башливәтти.

Бу арида америка һөкүмәт хадимлири йәнә, америкиниң сәуди әрәбистан вә парис қолтуқидики әрәб дөләтлиригә 20 милярд доллар қиммитидә қорал сетип беришни пилан қиливатқанлиқини ашкарилиди.

Кандилиза райис оттура шәрқтики зияритини башлаштин бурун, ирландийә җумһурийитидә мухбирларға " : шәк - шүбһисизки , иран америка вә оттура шәрқ дөләтлириниң мәнпәәтидики бир чоң тәһдит һесаблиниду "деди.

Мутәхәссисләрниң билдүрүшичә, америкиниң оттура шәрқ дөләтлиригә һәрбий ярдәм көрситиши, иран кеңәймичилики вә буниңдин кейин мәйданға келидиған зораванлиқ һәрикәтлириниң алдини елишни мәқсәт қилидикән. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.