Isra'iliyining liwan'gha qaratqan hawa hujumliri dawamlishiwatidu

Isra'iliyining liwan'gha qaratqan hawa hujumliri dawamlishiwatidu. Isra'iliye herbiy qisimliri qurughluqtinmu liwan térritoriyisige bésip kirgen bolup, seyshenbe küni liwanning bint jebil shehiri etrapida isra'iliye eskerliri bilen hizbulla jengchiliri otturisda qattiq toqunush yüz bergen. Isra'iliye qisimliri bint jibil shehiridiki hizbullaning herbiy shtabini qorshiwalghan.

Xewerlerge qarighanda, hizbulla jengchiliri herbiy jehettin özliridin nahayiti üstün bolghan isra'iliye armiyisige qattiq qarshiliq körsetmekte. Gerche isra'iliye armiyisi bnt jibil shehirining kontrolluqni qolgha alghanliqini bayan qilghan bolsimu, emma bu xewer téxi musteqil menbeler teripidin éniqlanmidi. Toqunushlarda 14 isra'iliye eskiri yarilan'ghan.

Isra'iliye armiyisi düshenbe küni bint jibilni élishqa tirishqan bolup, lékin hizbulla jengchilirining qattiq qarshiliq körsitishi netijiside sheherning sirtida toxtap qalghan idi.

Bu arida ottura sherqtiki toqunushlarni toxtitish üchün diplomatiye pa'aliyetlirimu dawamlishiwatidu. Ikki kün awal liwan, isra'iliye we pelestin rehberliri bilen körüshken amérika tashqi ishlar minstiri kondaliza rayis bugün ottura sherq mesilisi heqqide échilghan bir xelq'ara yéghin'gha qatnishish üchün italiyining paytexti rim shehirige keldi.

Charshenbe küni bashlinidighan we isra'iliye bilen liwan otturisidiki urushni toxtitishni meqset qilghan bu yéghin'gha 15 dölet we üch chong xelq'ara teshkilatning wekilliri qatnishidiken. (Qanat)