Исраилийә ливанда қаза қилған б д т хадимлириға қайғусини ипадилиди

Исраилийә баш министири ехуд олмерт чаршәнбә күни исраийилиниң ливандики бомбардиманида қаза қилған 4 нәпәр б д т хадиминиң өлүмигә болған чоңқур қайғусини ипадилиди һәмдә буниң бир мәқсәтлик елип берилған һуҗум әмәсликини күчлүк әскәртти.

Америка бирләшмә агентлиқиниң мәлум қилишичә, олмерт бирләшкән дөләтләр тәшкилатиниң баш секритари коффи аннанға вәдә берип, уларниң бу вәқә үстидин тәлтөкүс тәкшүрүш елип берип, б д т ға тәкшүрүш нәтиҗисини доклат қилидиғанлиқини билдүргән. Әмма коффи аннан буниңдин авал исраилийә қисимлириниң б д т ниң ливандики бу тинчлиқ қоғдаш понкитиға қәстән һуҗум қилғанлиқини көрсәткән иди.

Коффи аннан сөзидә йәнә, б д т ниң ливандики бу понкитиниң узун мәзгилдин буян бу йәрдә мәвҗут болуп турғанлиқини һәмдә б д т бәлгисиниң рошән көрүнүп туридиғанлиқини әскәртти. Сәйшәнбә күни ливанниң йәрлик вақти кәч саәт 7 йерим әтрапида исраилийә ливанниң җәнубий райониға һавадин һуҗум қилған. Буниң нәтиҗисидә бу йәрдики б д т тинчлиқ қоғдаш понкити вәйран болуп, 4 нәпәр хадим қаза қилған.

Уларниң арисида бири хитай пуқраси икән. Хитай даирилири бу мунасивәт исраилийә һөкүмитидин бу һәқтә кәчүрүм сорашни тәләп қилди һәмдә бирләшкән дөләтләр тәшкилати бихәтәрлик кеңишини бу вәқә сәвәблик исраилийини күчлүк әйибләшкә чақирди.

Исраилийиниң ливанда 15 күндин буян елип бериватқан һуҗумлирида һазирғичә 418 нәпәр ливанлиқ қаза қилди һәмдә ливандики һизбулла тәшкилатиниң зәрбисидә 42 исраилийилик өлди. (Пәридә)