Isra'iliye liwanda qaza qilghan b d t xadimlirigha qayghusini ipadilidi

Isra'iliye bash ministiri éxud olmért charshenbe küni isra'iyilining liwandiki bombardimanida qaza qilghan 4 neper b d t xadimining ölümige bolghan chongqur qayghusini ipadilidi hemde buning bir meqsetlik élip bérilghan hujum emeslikini küchlük eskertti.

Amérika birleshme agéntliqining melum qilishiche, olmért birleshken döletler teshkilatining bash sékritari koffi annan'gha wede bérip, ularning bu weqe üstidin teltöküs tekshürüsh élip bérip, b d t gha tekshürüsh netijisini doklat qilidighanliqini bildürgen. Emma koffi annan buningdin awal isra'iliye qisimlirining b d t ning liwandiki bu tinchliq qoghdash ponkitigha qesten hujum qilghanliqini körsetken idi.

Koffi annan sözide yene, b d t ning liwandiki bu ponkitining uzun mezgildin buyan bu yerde mewjut bolup turghanliqini hemde b d t belgisining roshen körünüp turidighanliqini eskertti. Seyshenbe küni liwanning yerlik waqti kech sa'et 7 yérim etrapida isra'iliye liwanning jenubiy rayonigha hawadin hujum qilghan. Buning netijiside bu yerdiki b d t tinchliq qoghdash ponkiti weyran bolup, 4 neper xadim qaza qilghan.

Ularning arisida biri xitay puqrasi iken. Xitay da'iriliri bu munasiwet isra'iliye hökümitidin bu heqte kechürüm sorashni telep qildi hemde birleshken döletler teshkilati bixeterlik kéngishini bu weqe seweblik isra'iliyini küchlük eyibleshke chaqirdi.

Isra'iliyining liwanda 15 kündin buyan élip bériwatqan hujumlirida hazirghiche 418 neper liwanliq qaza qildi hemde liwandiki hizbulla teshkilatining zerbiside 42 isra'iliyilik öldi. (Peride)