Өзбекистан ислам һәрикити таһир йолдашниң һаят икәнликини елан қилди

2007-04-08
Елхәт
Пикир
Share
Принт

Өзбекистан ислам һәрикити тәшкилати техи йеқинда вәзиристанда йүз бәргән қораллиқ тоқунушта өлди дәп елан қилинған өзбекистан ислам һәрикити тәшкилатиниң рәһбири таһир йолдашниң һаят вә сақ-саламәт икәнликини елан қилған.

Бу һәқтә пәрғанә агентлиқи учурға игә болған болуп, игилинишләргә қариғанда, таһир йолдаш алла бурун мәзкур тоқунуш йүз бериватқан қәбилиләр районидин айрилип кәткән икән.

Алдинқи һәптиләрдики хәвәрләрдә мәзкур җайларда йүз бәргән җәңләрдә талибанлар сепидики өзбек қораллиқ пидайилиридин хели көп сандикилириниң өлтүрүлгәнлики ейтилған. Пакистандики "давн" намлиқ гезит мәзкур қәбилиләр районидики өзбекистан ислам һәрикити әзалириниң өз истикаһмлиридин һәйдәп чиқирилип, шин варсак вә зағундай қатарлиқ җәнубий вәзиристан нуқтилириға нисбәтән контроллуқ орнитилғанлиқини хәвәр қилған. Шин варсак вә зағундай районидин өлтүрүлгән 13 нәпәр өзбекниң җәсити тепилған.

Пәрғанә агентлиқиниң хәвәр қилишичә, тоқунуш җәрянида 150 нәпәр өзбек қораллиқ җәңчиси өлтүрүлгән. Хели көп сандики йәрлик қәбилә пуқралири өзбекистан ислам һәрикити тәрәптә туруп уруш қилған. Таһир йолдашниң йенида көп санда таҗикларму бар икән.

Өзбекистан ислам һәрикити тәшкилати өзбекистан рәһбири ислам кәримопқа қарши қурулған қораллиқ тәшкилат болуп, буниңдин 5-6 йиллар илгири улар қирғизистанниң баткәнт райони вә башқа җайлар арқилиқ өзбекистанға кирип, өзбек вә қирғиз армийиси билән уруш қилған. Ислам кәримоп хәлқара җәмийәттин бу тәшкилатни террорлуқ тәшкилат тизимликигә киргүзүшни тәләп қилған иди. Мәзкур гуруһниң асаслиқ рәһбири җүмә нәмангани билән таһир йолдаш болуп, намангани илгирики тоқунушларда өлгән. (Үмидвар)

Пикирләр (0)
Share
Толуқ бәт