Өзбекистан һөкүмити әнҗан вәқәси һәққидә явропа иттипақи билән сөһбәтлишишни қобул қилди

явропа иттипақиниң бир вәкилләр өмики өзбекистан һөкүмәт хадимлири билән 2005‏- йили йүз бәргән әнҗан вәқәси вә бу вәқәниң кишилик һоқуқ вәзийити үстидики тәсири һәққидә сөзлишиш үчүн дүшәнбә күни ташкәнткә барди.

Өзбекистан ташқи ишлар министирлиқиниң баянатчиси, явропа иттипақи вәкилләр өмикиниң өзбекистан баш тәптиш идариси хадимлири билән учришидиғанлиқини билдүрди.

явропа иттипақиниң оттура асия алаһидә вәкили пийәр мурил, азадлиқ радиоси өзбек бөлүмигә бәргән баянатида, өзбекистан һөкүмитиниң бир ай давамлашқан сөһбәттин кейин, явропа иттипақи хадимлири билән әнҗан вәқәси тоғрисида сөһбәтлишишни қобул қилғанлиқини әскәртти.

явропа иттипақи вәкилләр өмики 14 нәпәр әдлийә, сақчи вә кишилик һоқуқ мутәхәссисдин тәшкил тапқан болуп, улар әнҗан вә ташкәнтдә 2005‏- йили әнҗанда йүз бәргән қирғинчилиқ һәққидә тәкшүрүш елип баридикән. Өзбекистан һөкүмәт даирилири әнҗан вәқәсидә көпинчиси қораллиқ милитантлар 187 кишиниң өлгәнликини баян қилмақта. Һалбуки вәқә шаһитлири вә кишилик һоқуқ тәшкилатлири әнҗанда елип берилған наразилиқ намайиши җәрянида көпинчиси аяллар вә кичик балилардин тәшкил тапқан йүзлигән кишиниң өзбекистан бихәтәрлик қисимлири тәрипидин өлтүрүлгәнликини билдүрмәктә.

Көпчиликкә мәлум болғандәк, әнҗан вәқәсидин кейин, президент ислам кәримофниң америка вә ғәрб дөләтлириниң вәқә һәққидә хәлқаралиқ бир тәкшүрүш елип берилиш тоғрисидики тәләплирини рәт қилиши, ғәрб дөләтлири билән өзбекистан оттурисидики мунасивәтләрниң кәскинлишишигә сәвәб болған иди. (Қанат)