Yaponiyilik bir diplomat xitayning bésimigha uchrighanliqtin özini öltüriwaldi

Yaponiyining shangxeyde turushluq konsulxanisida ishleydighan 40 nechche yashlardiki yaponiyilik bir diplomat, xitay dölet bixeterlik da'iriliri teripidin tehditke uchrighandin kéyin, bésimgha chidimay özini öltürüwalghan.

Mezkur diplomatning ölüwélishtin burun konsulxana qaldurghan wesiyetnamisida, xitay dölet bixeterlik orginida ishlaydighan bir kishi, mezkur diplomatqa uning bezmixanidiki bir kütküchi qiz bilen bolghan gheyri resmi munasiwitini pash qiliwétidighanliqi toghrisida tehdit sélip, uningdin yaponiye konsulxanisining mexpiy matiryalliri bilen teminleshni telep qilghan. Bu diplomat wesiyetnamisida " dölitige satqunluq qilish niyiti" yoqliqini bildürgen.

Yaponiye metbu'atlirining eskertishiche, mezkur diplomat héliqi kishini mexpiy matériyallar bilen teminlimigen bolushi mumkin. Yaponiye da'irliri, eger bu weqe rast bolup chiqsa, yaponiye hökümitining buninggha inkas qayturidighanliqini bildürmekte. Yaponiye hökümiti béyjing da'irlirigha resmi yollar bilen naraziliq bildürüshi mumkin.

Emma xitay tashqi ishlar ministirliki bayanatchisi chin gang, xitay dölet bixeterlik da'irilirining yaponiyilik diplomatqa tehdit salghanliqini ret qilip, bu weqeni xewer qilghan yaponiye metbu'atlirini eyiblidi. U seyshenbe künki axbarat élan qilish yighinida, "yaponiye metbu'atlirining bezi chüshendürüshliri héchqandaq asasqa tayanmighan," deydu.

Bu yil kirgendin béri yaponiye bilen xitay otturisidiki diplomatik sürkilish barghanche kücheymekte. Yéqinda xitay bash ministiri wén jyabaw yaponiye bash ministiri bilen söhbet ötküzüshni ret qilghan. Yaponiye tashqi ishlar ministiri, ötken hepte jonggoni "intayin zor tehdit," dep tekitligen idi. (Erkin)