Пакистан қошунлири җәнубий вазиристандики мусулман пидаиларға һуҗум қилди

Пакистан аманлиқ күчлири чаршәнбә күни афғанистан чегрисидики йеқинда икки нәпәр хитай инженири гөрүгә еливелинған җәнубий вазиристанда қораллиқ мусулман пидаийлар билән тоқунушуп, үч пидаийни өлтүрди, төтини яридар қилди, пакистан қисимлиридин үч әскәр яриланди.

Пакистан һәрбий тәрәп баянатчиси шавкәт султанниң билдүрүшичә, мусулман пидаийлар җәнубий вазиристан мәркизи вананиң ғәрбидики азам варсақ йезиси әтрапида мәзкур райондики пакистан қисимлириниң қаравулханисиға һуҗум қилған. Үч нәпәр мусулман пидаий тоқунуш җәрянида өлгән. Шавкәт султан , яриланған 4 нәпәр пидаийниң әсиргә елинғанлиқини билдүрди. Бирақ у әсирләрниң дөләт тәвәликини елан қилиштин өзини қачурған.

Җәнубий вазиристан әрәпләр , афғанлар , чечәнләр вә оттура асиялиқларни өз ичигә алған нәччә йүз кишилик чәтәл пидаийлириниң асаслиқ паалийәт райони дәп қарилиду. Пакистан қисимлири бу йил 4 - айдин бери мәзкур районда чәтәллик мусулман пидаийлар вә райондики әл қаийдә күчлиригә қарши һәрбий һәркәт елип бармақта.

Шундақла пакистан қисимлири бу районда җәнубий вазиристандики мусулман пидаийларниң қомандани абдулла мәсудни издимәктикән. Абдулла мәсуд йеқинда мәзкур райондики су амбири қурулушиға қатнишиватқан икки нәпәр хитай инςенирни гөрүгә елиш һәркитигә йитәкчилик қилиш билән тонулған. Хитай инженирларниң бири қутқузуш һәркити җәрянида өлтүрүгән иди. (Пәридә)