Пакистанда өзбек милитантлар билән қәбилә җәңчилири оттурисидики тоқунуш давамлишиватиду

Пакистанниң, афғанистан чегриси йеқинидики җәнубий вәзиристан районда панаһланған өзбек милитантлар билән йәрлик қәбилиләр оттурисида 19‏- март күни башланған тоқунушлар давамлашмақта. Шәнбә күнидики тоқунушларда һәр икки тәрәп ракита вә зәмбрәк қатарлиқ еғир типитики қораллар ишләткән.

Пакистан ички ишлар министири афтап әхмәтхан ширпав, җүмә күни өзбек милитантлар билән йәрлик қәбилә җәңчилири оттурсида йүз бәргән тоқунушларда 50 дин артуқ кишиниң өлгәнликини билдүрди.

Пакистан даирилириниң хәвәр қилишичә, җәнубий вәзиристандики тоқунушларда һазирғичә 213 киши өлгән болуп, өлгәнләрниң 177 си өзбек милитантлар икән.

Пакистан һөкүмити, йәрлик қәбилиләр билән районда панаһланған өзбек милитантлар оттурисидики тоқунушларни, һөкүмәтниң пакистан афғанистан чегра райондики чәтәллик милитантларни йәрлик қәбилиләрниң қоли арқилиқ юқ қилиш пиланниң ғәлибиси дәп қаримақта.

Пакистан һөкүмити бир нәччә қетим кәң көләмлик һәрбий һәрикәтләр елип барған болсиму, әмма афғанистандики талибанлар һакимийити гумран болғандин кейин, пакистан - афғанистан чегра районида панаһланған чәтәллик милитантларни райондин чиқралмиған. Бу һәрикитидә мәғлуп болған пакистан һөкүмити йеқинда йәрлик қәбилиләр билән тинчлиқ келишими имзалиған иди. Бу келишимгә асасән пакистан һөкүмити районда һәрбий һәрикәт елип беришни тохтитишни қобул қилған. Йәрлик қәбилиләр болса, чәтәллик милитантларниң районда паалийәт елип беришиға рухсәт бәрмәсликини вәдә қилған. Әмма пакистан һөкүмитиниң қәбилиләр билән имзалиған келишими ғәрб дөләтлири болупму афғанистан һөкүмитиниң тәнқидигә учриған. Улар бу келишим талибанларниң районда әркин паалийәт елип беришиға икманийәт яритип бериду дәп көрсәтмәктә. (Қанат)