Pakistanda xitay puqraliri étip öltürüldi


2007-07-09
Share

Pakistanning gherbiy - shimalidiki pishawur shehiride yekshenbe küni bir motosiklit karxanisida ishleydighan 3 neper xitay téxnik xadimi, salahiyiti namelum qoralliq kishiler teripidin étip öltürüldi. Yene bir neper xitay téxnik xadimi éghir yarilandi.

Pishawur shehirining yuqiri derijilik saqchi emeldari abdulkerim, qoralliq kishilerning salahiyiti we xitay puqralirigha hujum qilishtiki meqsidi hazirche melum emeslikini bildürgen bolsimu, lékin u, bu weqe afghanistan chégrisidiki qebililer rayonida pa'aliyet élip bériwatqan islam jengchilirining öch élish herikiti ikenlikidin gumani yoqluqini bildürgen.

Buningdin burun yéqinqi bir qanche yildin béri, pakistanda xitay puqralirigha hujum qilish weqeliri köp qétim yüz bergen we bezi weqelerde xitay puqraliri öltürülgen idi. Bu weqe pakistan paytexti islam'abadtiki qizil meschitlik radikal taliplarning islam'abadtiki bir xitay pahishixanisigha hujum qilip, 6 neper xitay ayalni görüge éliwélish weqesidin kéyin, qizil meschitlik taliplar bilen pakistan hökümiti arisida toqunush kélip chiqqan we bu toqunush hazirghiche dawam qiliwatqan weziyette yüz berdi.

Bu weqe qizil meschitlik taliplarni qollighuchilarning herikiti yaki emesliki hazirche melum emes. Lékin qizil meschitlik taliplarning xitay pahishe ayallirini görüge éliwélish weqesi yüz bergendin kéyin, bu weqe xitay da'irilirining naraziliqini qozghap, pakistan ichki ishlar ministiri aptap xan sherpodin qizil meschitlik taliplarni jazalap bérishni telep qilghanliqi kishilerge melum idi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet