Пакистан һөкүмәт армийиси қизил мәсчиткә қораллиқ һуҗум қилди

Пакистан һәрбий даирилириниң баянатчиси бүгүн ахбарат саһәсигә, дүшәнбә күни пакистан пайтәхти исламабадтики қизил мәсчитлик талиплар билән сөһбәт нәтиҗисиз болғандин кейин җаһил күчләрни қораллиқ тинҗиттуқ дәп җакарлиди.

Баянатчиниң билдүрүшичә, пакистан һөкүмәт армийисиниң қизил мәсчиткә қарита қораллиқ һуҗуми дүшәнбә күни сәһәр төттә башланған болуп, қизил мәсчитлик талипларму җиддий қаршилиқ көрсәткән, қораллиқ тоқунуш җәрянида аз дегәндә әллик нәпәр талип етип өлтүрүлгән. Йәнә әллик нәпәр қаршилашқучи қолға елинған. Һазирғичә қизил мәсчитлик талипларниң үчтин икки қисими тинҗитилған. Тоқунушта йәнә һөкүмәт армийисиниң сәккиз нәпәр әскири өлгән, 15 и яриланған.

Униң билдүрүшичә, қизил мәсчиттин талиплар гөрүгә алған нәччә йүз аял вә балилар тепилмиған әмма 20 нәпәр бала аман ‏- есән қизил мәсчиттин қечип чиққан. Буниң алдида пәрвиз мушәррәп һөкүмити бир килиштүргүчиләр өмикини қизил мәсчиттики талиплар билән сөһбәт өткүзүшкә әвәткән болсиму, абдулрәшид ғази йетәкчиликидики қизил мәсчитлик талиплар һөкүмәткә тәслим болушни рәт қилған иди.

Пакистан президенти пәрвиз мушәррәп өткән шәнбә күни әгәр талиплар тәслим болмиса, өлтүрүлидиғанлиқини агаһландурған болсиму, лекин талипларниң рәһбири абдулрәшид ғази, өлсиму тәслим болмайдиғанлиқини җакарлиған иди. (Гүлчеһрә)