Pakistan hökümet armiyisi qizil meschitke qoralliq hujum qildi

Pakistan herbiy da'irilirining bayanatchisi bügün axbarat sahesige, düshenbe küni pakistan paytexti islam'abadtiki qizil meschitlik taliplar bilen söhbet netijisiz bolghandin kéyin jahil küchlerni qoralliq tinjittuq dep jakarlidi.

Bayanatchining bildürüshiche, pakistan hökümet armiyisining qizil meschitke qarita qoralliq hujumi düshenbe küni seher tötte bashlan'ghan bolup, qizil meschitlik taliplarmu jiddiy qarshiliq körsetken, qoralliq toqunush jeryanida az dégende ellik neper talip étip öltürülgen. Yene ellik neper qarshilashquchi qolgha élin'ghan. Hazirghiche qizil meschitlik taliplarning üchtin ikki qisimi tinjitilghan. Toqunushta yene hökümet armiyisining sekkiz neper eskiri ölgen, 15 i yarilan'ghan.

Uning bildürüshiche, qizil meschittin taliplar görüge alghan nechche yüz ayal we balilar tépilmighan emma 20 neper bala aman ‏- ésen qizil meschittin qéchip chiqqan. Buning aldida perwiz musherrep hökümiti bir kilishtürgüchiler ömikini qizil meschittiki taliplar bilen söhbet ötküzüshke ewetken bolsimu, abdulreshid ghazi yétekchilikidiki qizil meschitlik taliplar hökümetke teslim bolushni ret qilghan idi.

Pakistan prézidénti perwiz musherrep ötken shenbe küni eger taliplar teslim bolmisa, öltürülidighanliqini agahlandurghan bolsimu, lékin taliplarning rehbiri abdulreshid ghazi, ölsimu teslim bolmaydighanliqini jakarlighan idi. (Gülchéhre)