Pakistanda élip bérilghan özini öltürüwélish xaraktérlik hujumda 9 kishi öldi


2007-08-04
Share

Shenbe küni pakistanda yene qanliq hujum we toqunushlar yüz berdi. Pakistanning gherbiy shmal rayonidiki parachinar shehiride élip bérilghan özini öltürüwélish xaraktérlik hujumda 9 kishi ölgen we 35 kishi yarilan'ghan bolup sheher ichidiki bazarda élip bérilghan bu hujumda nurghunlighan dokan we mashina weyran bolghan. Shundaqla pakistanning shimaliy weziristan ölkiside talibanlarni qollaydighan militanlarning bir herbiy ponkitigha hujumi netijiside 4 pakistan eskiri ölgen we 4 esker yarilan'ghan. Pakistan armiye bayanatchisi génral wahid ershedning bildürüshiche, toqunushlarda 10 militant pakistan eskerliri teripidin öltürülgen.

Shimaliy weziristan elqa'ide we taliban qalduqlirining pa'aliyet merkizi bolup hésablinidu. Shunga amérika hökümiti rayondiki militantlargha qarshi herbiy heriket élip bérishi üchün pakistan hökümitige bésim ishletmekte. Gerche pakistan hökümiti hazirghiche keng kölemlik bir herbiy heriket bashlatmighan bolsimu, emma rayonda bixeterlik tedbirlirini kücheytken. Pakistan hökümitining bu herikiti militanlarning pakistan armiyisige qaratqan hujumlirini köpeytishige seweb bolmaqta.

Pakistan prézidénti perwiz musherrep ötken yili shimaliy weziristandiki qebililer bilen tinchliq kélishimi imzalighan idi. Kélishimge asasen pakistan hökümiti shimaliy weziristandiki herbiy tazilash herikitini toxtitishni we qebililer bolsa rayonda chet'ellik militanlarning pa'aliyet élip bérishige ruxset qilmasliqni wede qilghan.

Lékin pakistan armiyisining ötken ay islam abadtiki qizil meschitke qaratqan hujumidin kéyin, shimaliy weziristandiki qebililer pakistan hökümiti bilen imzalan'ghan kélishimni bikar qilghan. Pakistan armiyisining qizil meschitge qarita élip barghan herbiy herikitidin kéyin pakistanda weziyet jiddiyleshken bolup, pakistanning her qaysi rayonlirida élip bérilghan n hujumlar we yüz bergen toqunushlarda hazirghiche 200din artuq adem öldi. (Ömer qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet