Butto, pakistan armiyisining pinsiyige chiqqan générallirini partlash weqesige jawabkar dep eyiblidi

Sürgündiki hayatini axirlashturup peyshenbe küni dölitige qaytqan pakistanning sabiq ayal bash ministiri binezer butto, shu küni uni qarshi élish pa'aliyitide yüz bergen partlash weqeside pakistan armiyisining pinsiyige chiqqan générallirining qoli bar, dep eyiblidi. Buttoning eskertishiche, uninggha qaritilghan bu süyiqest weqeside merhum prézidént ziya ol heqqe sadiq générallar diniy esebiy küchlerni qollighan. Butto bu sözlerni fransiyide chiqidighan bir zhurnalda élan qildi.

Xewerlerge qarighanda , butto süyiqesttin aman ‏- isen qutulghan bolsimu, lékin buttoning mashina etritige qaritilghan özini öltürüwélish xaraktérlik hujumda uning qollighuchiliridin az dégende 130 adem ölgen. Butto, islam diniy esebiylirining bashqilar yardem qilmay turup, bu ishni öz aldigha élip baralmaydighanliqini bildürgen.

1999 ‏- Yildin béri chet'elde sürgünde yashawatqan butto, yéqinda pakistan herbiy rehbiri perwiz musherrep bilen hoquqqa teng shérik bolush kélishimi hasil qilghandin kéyin, peyshenbe küni dölitige qaytip karachigha qon'ghan idi. Shu küni uni nechche on minglighan kishi qarshi élishqa chiqqan. Lékin esebiy diniy küchler butto pakistan'gha kélishtin burunla uni agahlandurup, eger pakistan'gha kelse öch alidighanliqini élan qilghan.

Süyiqest weqeside nurghun adem ölgen bolsimu, lékin butto bu weqede tashqi dunyadin zor siyasiy desmaye toplighan boldi. Amérika prézidént ishxanisi aqsaray we yawropa ittipaqi weqeni eyiblidi. Xitay hökümiti pakistanning muqimliqini tilidi. Hindistan tashqiy ishlar ministirliqi, süyiqest buttogha qaritilghan bolsimu, bunchilik köp ademning ölümini keltürüp chiqarghan bu weqe lenetlinishke tégishlik, dep körsetti. (Erkin)