Хәлқара пакистанниң сиясий вәзийити һәққидә тез инкас қайтурмақта


2007.11.07

Пакистан президенти пәрвиз мушәррәп йеқинда һәрбий һаләт җакарлап, өктичи партийиләрниң кочиға чиқип топлиниш, намайиш қилишини чәклигәндин кейин, җәнубий асия вәзийитидә җиддийлик пәйда болди. Франсийә агентлиқиниң 7 ‏- ноябир күни исламабадтин баян қилишичә, пакистанниң парламинт сайлими 14 ‏- ноябир күни өткүзилидиғанлиқи бекитилди. Һазир өктичи партийиләрниң намайиши барғансери әвҗ алмақта.

Һәр қайси учур вастилириниң баян қилишичә, б д т ниң баш катиби бан кимун әпәнди пакистан президенти мушәррәптин һәрбий һаләтни ахирлаштурушни тәләп қилған. Америка ташқи ишлар министири кандилиза райс ханим һазирқи пакистан вәзийитигә әпсуслинидиғанлиқи вә америкиниң пакистанға беридиған ярдимини қайтидин ойлишидиғанлиқини билдүргән. Әнгилийә ташқи ишлар вәзириму пәрвәз мушәррәпни асасий қанун буйичә иш көрүш, әркинлик вә адил сайлам елип бериш һәққидә бәргән вәдисигә әмәл қилиши лазимлиқини көрсәткән.

Хәвәрләргә қариғанда йәнә, һиндистан парламенти җиддий йиғин ечип, пакистан кризисигә тақабил туруш тәдбирлирини музакирә қилған. Афғанистан президенти һамит карзай болса пакистан билән чегридики қораллиқ топилаңчиларға зәрбә бериш һәмкарлиқиниң тәсиргә учримаслиқиға тиләкдашлиқ билдүргән.

Хитайниң ташқи ишлар министирлиқи баянатчиси лю җәнчав 'җуңго һазирқи пакистан вәзийитигә, болупму пакистанниң муқимлиқиға әһмийәт бериду, әмма пакистан рәһбәрлириниң өз мәсилисини һәл қилиш қабилийитигә ишиниду ' дегән вә саяһәт қилидиған хитай пуқралирини бихәтәрлик җәһәттә агаһландуридиғанлиқини билдүргән. (Вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.