Пакистан сақчилири бинәзәр буттони йәниму қаттиқ назарәт астиға алди


2007.11.13

Сәйшәнбә күни пакистан президенти пәрвиз мушәррәп йәнә йүзлигән сақчини ишқа селип,пакистан сабиқ баш министири бинәзәр буттони лаһордики туралғусида қайтидин өйидә нәзәрбәнт қилди. Бу мушәррәпниң 3 - ноябир пакистанда җиддий һаләт йүргүзгәндин буян бинәзәр буттони иккинчи қетим нәзәрбәнт астиға елиши.

Буниң алдида бутто ханим мушәррәпни һәрбий қоманданлиқ вә пирездентлиқтин истипа беришкә чақириқ қилип ахбарат саһәсигә баянат бәргән иди.

У әнгилийә б б с радио телевизийиси мухбириниң зияритини қобул қилғанда " мушәррәп чоқум орнини бошитиши керәк, диктаторлуқ түзүм йүргүзүлидиған заман ахирлашти . У диктаторлуқ түзүми биләнму милитанларни тинҗиталмиди, мана бу бизниң пәрвиз мушәррәптин истипа беришни тәләп қилишимиздики сәвәб " дегән шундақла әмди мушәррәп билән сөһбәт өткүзмәйдиғанлиқини билдүргән.

Бутто ханим әсли пилани буйичә бүгүн лаһорда елип берилмақчи болған кәң көләмлик хәлқ наразилиқ намайишиға йетәкчилик қилмақчи иди.

Америка авази радиосиниң хәвиридә көрситишичә, сәйшәнбә күни лаһорниң кочилири нәччә йүз, миңлиған қораллиқ әскәр һәм сақчилар билән тошқан болуп, буттониң туралғусиға маңидиған йөнүлүштики барлиқ йол еғизлири сим тосақ, төмүр ишик, қум халтилар һәм һәрбий аптомобиллар билән тосулған.

Пакистан хәлқ партийиси лаһорда тәшкиллигән бу намайишчилар чаршәнбә күни ислам абадта мушәррәпниң һәрбий һаләтни бикар қилиши вә истипа беришини тәләп қилип, үч күн давам қилидиған йәниму зор намайиш паалийити елип бериш үчүн атланмақчи иди, әмма пакистан һөкүмити" бутто тәшкиллигән бу намайиш һәрикити қанунсиз һәрикәт " дәп билдүрмәктә. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.