Пакистан кирзис ичидә қалди


2007.11.06

-6 Ноябир, сәйшәнбә күни, ислам абадтики сот мәһкимиси әтрапиға нәччә йүзлигән адвокатлар һәм әдилийә хадимлири йиғилип, мушәррәпниң пакистанда һәрбий һаләт йүргүзгәнликигә наразилиқ билдүргән.

Америка с н н телевизийисиниң хәвиригә қариғанда мушәррәп пакистанда һәрбий һаләт йүргүзүшкә башлиған төт күндин буян үч миңдәк адвукат қолға елинған. Пакистан кирзиси һәққидә учур еливатқан чәтәл ахбарат органлириниң хадимлири һәм мухбирларму қолға елинмақта икән.

Мушәррәп өткән шәнбә күни пакистан асасий қануниниң йүргүзилишини әмәлдин қалдуруп пакистан бойичә һәрбий һаләт йүргүзүшкә башлиди. Мушәррәпниң қайта президентлиққа сайлинишиға қарши гуруһларниң вәкиллик адими дәп қаралған пакистан алий сот мәһкимисиниң баш сотчисини нәзәрбәнт қилған иди. Чүнки бу баш сотчи адвокатларни пакистан асасий қанунини қайтидин иҗра қилишқа чақирған шундақла мушәррәпниң һәрбий һаләт йүргүзүшини қанунсиз дәп билдүргән иди.

Америка авази радиосиниң сәйшәнбә хәвәр беришичә, мушәррәп һөкүмити тәрипидин аилисидә нәзәрбәнт қилинған пакистан алий сот мәһкимисиниң баш сотчиси қол телефон арқилиқ әдлийә хадимлириға учур берип,амма арисида мушәррәпниң пакистанда өткән шәнбә күнидин башлап һәрбий һаләт йүргүзүватқанлиқиға болған наразилиқниң күчийиватқанлиқини һәмдә һөкүмәтниң президент сайлиминиң вақит җәдвилини бекитишни ойлишиватқанлиқини билдүргән.

Пакистан келәр йили январда өткүзүшни пилан қилған президент сайлими, һазир йүргүзүлүватқан һәрбий һаләт түпәйли пакистанниң ғәрб әллиридики иттипақдашлирини шундақла хәлқара җәмийәтни әндишигә салмақта. Америка президенти җорҗ буш дүшәнбә күни ақ сарайда қилған баянатида,президент мушәррәпниң пакистан асасий қануниниң йүргүзилишини тохтатқанлиқи шундақла һәрбий һаләт йүргүзгәнликиниң әндишә пәйда қилғанлиқини тәкитлигән. Һәмдә уни һәрбий формисини селип ташлап, президент сайлимини январда вақтида елип беришқа дәвәт қилған. Америка авази радиоси хәвиридә америка дөләт мудапиә министирлиқи баянатчисиниң сөзини нәқил кәлтүрүшичә, америка пакистанға һәр йили бериватқан нәччә милярд доллар қиммитидики һәрбий әслиһәләрниң ярдими һәмдә һәр айда берилидиған сәксән миң доллар ярдиминиму тохтитишни ойлашмақта.

Америка афғанистанда террорчилиққа қарши уруш қозғиған 2001 - йилидин буян пакистанни 10 милярд доллардин артуқ ярдәм билән тәминләп кәлгән. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.