Pakistan kirzis ichide qaldi

-6 Noyabir, seyshenbe küni, islam abadtiki sot mehkimisi etrapigha nechche yüzligen adwokatlar hem ediliye xadimliri yighilip, musherrepning pakistanda herbiy halet yürgüzgenlikige naraziliq bildürgen.

Amérika s n n téléwiziyisining xewirige qarighanda musherrep pakistanda herbiy halet yürgüzüshke bashlighan töt kündin buyan üch mingdek adwukat qolgha élin'ghan. Pakistan kirzisi heqqide uchur éliwatqan chet'el axbarat organlirining xadimliri hem muxbirlarmu qolgha élinmaqta iken.

Musherrep ötken shenbe küni pakistan asasiy qanunining yürgüzilishini emeldin qaldurup pakistan boyiche herbiy halet yürgüzüshke bashlidi. Musherrepning qayta prézidéntliqqa saylinishigha qarshi guruhlarning wekillik adimi dep qaralghan pakistan aliy sot mehkimisining bash sotchisini nezerbent qilghan idi. Chünki bu bash sotchi adwokatlarni pakistan asasiy qanunini qaytidin ijra qilishqa chaqirghan shundaqla musherrepning herbiy halet yürgüzüshini qanunsiz dep bildürgen idi.

Amérika awazi radi'osining seyshenbe xewer bérishiche, musherrep hökümiti teripidin a'iliside nezerbent qilin'ghan pakistan aliy sot mehkimisining bash sotchisi qol téléfon arqiliq edliye xadimlirigha uchur bérip,amma arisida musherrepning pakistanda ötken shenbe künidin bashlap herbiy halet yürgüzüwatqanliqigha bolghan naraziliqning küchiyiwatqanliqini hemde hökümetning prézidént saylimining waqit jedwilini békitishni oylishiwatqanliqini bildürgen.

Pakistan kéler yili yanwarda ötküzüshni pilan qilghan prézidént saylimi, hazir yürgüzülüwatqan herbiy halet tüpeyli pakistanning gherb elliridiki ittipaqdashlirini shundaqla xelqara jem'iyetni endishige salmaqta. Amérika prézidénti jorj bush düshenbe küni aq sarayda qilghan bayanatida,prézidént musherrepning pakistan asasiy qanunining yürgüzilishini toxtatqanliqi shundaqla herbiy halet yürgüzgenlikining endishe peyda qilghanliqini tekitligen. Hemde uni herbiy formisini sélip tashlap, prézidént saylimini yanwarda waqtida élip bérishqa dewet qilghan. Amérika awazi radi'osi xewiride amérika dölet mudapi'e ministirliqi bayanatchisining sözini neqil keltürüshiche, amérika pakistan'gha her yili bériwatqan nechche milyard dollar qimmitidiki herbiy eslihelerning yardimi hemde her ayda bérilidighan seksen ming dollar yardiminimu toxtitishni oylashmaqta.

Amérika afghanistanda térrorchiliqqa qarshi urush qozghighan 2001 - yilidin buyan pakistanni 10 milyard dollardin artuq yardem bilen teminlep kelgen. (Gülchéhre)