Pakistan prézidént saylimi lal meschitining kölenggüside qaldi

Pakistan aliy sot mehkimisi jüme küni qarar élan qilip, shenbe küni ötküzülidighan pakistan prézidént saylimini öz waqtida élip bérish, lékin saylam netijisini kéchiktürüp élan qilishni jakarlidi. Közetküchiler, aliy sotning hökümi bu qétimqi saylamda qayta saylinish éhtimali zor bolghan prézidént musherrepning, qayta saylinishida muqimsizliq amilini kücheytti, dep qarashmaqta.

Öktichiler, musherrep herbiy formisi bilen saylamgha qatnashsa pakistan asasiy qanunigha xilap ikenlikini eskertip, aliy sot mehkimisige erz sun'ghan. Bash sotchi iqbal jüme küni aliy sotning hökümi toghrisidiki bayanatida "sotchilar saylamni waqtida élip bérish, lékin saylam netijisini aliy sot öktichilerning erzini körüp chiqqandin kéyin élan qilishni qarar qildi,"dep körsetti. Iqbalning eskertishiche, aliy sot mehkimisi musherrepning üstidin bérilgen erzni 10 - ayning 17 - küni körüp chiqidiken.

Pakistan prézidénti adette pakistan memliketlik milliy mejlisi we her qaysi ölkilerning ölkilik milliy mejlis ezaliri teripidin saylinidu. Bu qétimqi prézidént saylimi shenbe küni élip bérilidighan bolup, pakistan memliketlik milliy mejlis saylimi kéler yili 1 - ayda ötküzülidu.

Aliy sotning jüme küni élan qilghan hökümidin kéyin, musherrep shenbe künki saylamda utup chiqqan teqdirdimu, lékin uning prézidéntliq ornigha olturush yaki olturalmasliqi, aliy sotning 7 - öktebirde élan qilidighan axiriqi hökümige baghliqtur. Musherrep bu yil yazda xitay pahishilirini görüge tutqan lal meschitning taliplirini basturup, dindar guruhlarning ghezipini qozghighan idi. Bu qétim u öktichi partiyilerning herbiy porma bilen saylamgha qatnishish qanunsiz, deydighan riqabitige duch kelmekte. (Erkin)