Pakistan parlamént saylimi kéchiktürülüshi mumkin

Pakistan da'irilirining esli 8 - yanwar ötküzüsh békitilgen pakistan parlamént saylimini kéchiktüridighanliqi heqqide uchurlar tarqalghandin kéyin, pakistan öktichi partiyisi hemde amérikining naraziliqigha uchridi.

Pakistandiki öktichi partiye bolghan pakistan xelq partiyisi, saylamning kéchiktürülüshi pakistanda yenimu zor xelq naraziliqi hem toqunushlargha seweb bolushi mumkin dep agahlandurghan.

Amérika tashqi ishlar bayanatchisi tam keysi 31 - dékabir bu heqte bayanat bérip,"eger pakistan parlamént saylimining bixeter ötküzülüshi mumkin bolsa amérika uning kéchiktürülmeslikini ümid qilidu "dédi.

En'giliye b b s radi'o ‏- téléwiziyisining tarqatqan eng yéngi uchurlirigha asaslan'ghanda, pakistan prézidénti perwiz musherrepning -1yanwar küni parlamént saylimi heqqide qarar bérishining aldida, pakistan hökümet emeldarliri parlamént saylimining kéchiktürülüshi mumkinliki heqqidiki uchurlarni ashkarilighan.

B b s ning pakistanda turushluq muxbirining xewerde eskertishiche, pakistan xelq partiyisining rehbiri benezir butto qestlep öltürülgendin kéyin, uning 19 yashliq oghli iz basar bolup mezkur partiyining rehberlikini öz üstige alghan, gerche u saylam yéshigha toshmighan bolsimu, xelqning benezirning ölümi tüpeyli kücheygen qollash awazi bilen uning yuqiri awazgha érishish éhtimalliqi yuqiri dep qaraydiken. Del mushu sewebtin musherrep hakimiyitidiki pakistan hökümiti parlamént saylimi waqtini kéchiktürüsh arqiliq xelqning hésdashliq tüpeyli xelq partiyisige köplep bélet tashlishining aldini élishni meqset qiliwatqan bolushi mumkin.

Melum bolushiche, benezir butto qestlep öltürülgendin buyan,pakistan parlamént saylimi bilet tashlash orunliridin on nechchisi ghezeplen'gen ammining buzup chéqishida weyran bolghan. (Gülchéhre)