Pakistan xelq partisi, musherrepning hoquqlirini bikar qilishni pilanlimaqta

Pakistanda élip bérilghan parlamént saylimida, awazlarning eng köp qismini qolgha keltürgen, pakistan xelq partiyisi rehberliri, prézidént musherrepning parlaméntni bikar qilish qatarliq bezi hoquqlirini élip tashlaydighanliqini bildürdi.

Xewerlerge qarighanda, yanwar éyida bir süyiqest netijiside öltürülgen pakistanning sabiq bash ministiri benezir buttoning rehberlikidiki, pakistan xelq partiyisi, nöwette prézidént musherrepning qaysi hoquqlirini bikar qilish mesilsini muzakire qiliwatqan bolup bu heqtiki qararini düshenbe küni resmiy élan qilidiken.

Parlamént saylimida, pakistan xelq partiyisidin kéyin, eng köp awazgha érishken, pakistanning sabiq bash ministiri nawaz shiripning partiyisi, prézidént musherrepning nurghunlighan hoquqlirini bikar qilishni, xelq partiyisi bilen birlikte ishleshning aldinqi sherti dep, otturigha qoyghan.

Pakistan xelq partiyisi rehberliri, kimning bash ministirlik wezipisini öz üstige alidighanliqi mesilisinimu muzakire qiliwatqan bolup, xewerlerge qarighanda, bash ministirlik namzatliri arisida tejribilik siyasetchi we benezir buttoning uzun yilliq sepdishi, mextom imin fehim, xelq partiyisining penjap ölkisidiki wekili sha'e mexmut qureyshi we sabiq pakistan parlaméntning re'isi yosuf riza gélani qatarliq kishiler bar iken.

Jüme küni, pakistandiki parlamént saylimida ghelibe qilghan pakistandiki asasliq ikki siyasiy partiye, birleshme hökümet qurush mesilside kélishkenlikini jakarlighan idi. (Ömer qanat)