Pakistan hökümiti, pakistan xelqi bin ladinning chaqiriqini qollimaydu, dédi

Osama bin ladinning, pakistan xelqini amérikining ittipaqdishi hésablan'ghan, prézidént perwaz musherrepke qarshi isyan kötürüshke chaqirghanliqi, pakistanda az sandiki bir qisim radikal guruppilar arisida ghulghula qozghighan bolup, pakistandiki keng xelq ammisi arisida chong bir tesir qozghimighan. Pakistan hökümiti bolsa, bin ladinning pakistan xelqini isyan kötürüshke chaqirghan bayanatini, kölkülük bir chaqiriq dep, körsetmekte.

Pakistan prézidénti perwaz musherrepning bayanatchisi rashit qureyshi, jüme küni muxbirlargha bergen bayanatida, pakistan hökümitining bin ladinning chaqiriqigha jawap qayturush arqiliq, binladin'gha sorun yaritip bérishni xalimaydighanliqini bildürüp, pakistan xelqi bin ladinning chaqiriqi bilen héchqachan qorallinip, isyan kötürmeydu, dédi.

Lékin amérika birleshme agéntliqining bildürüshiche, gerche bin ladinning chaqiriqi pakistandiki keng xelq ammisining qollishigha érishelmigen bolsimu, emma pakistanning, térrorchiliqqa qarshi urushta amérikining sépida orun alghanliqining pakistanning muqimliqigha élip kelgen selbiy tesiri heqqide, pakistanda jiddiy munazire qozghishi mumkin iken.

Shundaqla, pakistan razwétka xadimliri jüme küni, pakistan da'irilirining bin ladinning chaqiriqigha jiddiy qarap, bixeterlik tedbirlirini kücheytkenlikini bildürmekte.

Bin ladin peyshenbe küni téléwizorlarda körsitilgen sin'alghu lintisida, iyul éyida pakistan herbiy qisimlirigha islam - abadtiki qizil meschitge hujum qilish toghrisida buyruq bergenliki üchün, pakistan prézidénti perwaz musherrepni kapir dep atighan.

Amérika razwétka xadimliri, pakistan hökümiti bilen pakistan-afghanistan chégra rayonidiki qebililer otturisida imzalan'ghan tinchliq kélishimining, elqa'ide teshkilatigha, qaytidin teshkillinip, pa'aliyetlirini kücheytishi üchün yaxshi purset yaritip bergenlikini bayan qilishmaqta. (Ömer qanat)