Xitay bash ministiri wén jyabaw pakistandiki ziyaritini bashlidi

Jenubiy asiya döletliridiki ziyaret sepirining tunji békiti pakistan'gha yétip barghan xitay bash ministiri wén jyabaw, pakistan - xitay siyasi munasiwitining mustehkemlikini körsitishke tirishishi mumkin. Amma iqtisadi hemkarliqni kéngeytish wén jyabawning ziyaret küntertipidiki muhim téma hésablinidiken.

Wén jyabaw, soda sana'etchiler we hökümet emeldarlirini asas qilghan 70 kishilik wekiller ömikini bashlap, seyshenbe küni pakistan paytextige qondi. U, shu küni pakistan bash ministiri shawket eziz bilen söhbet ötküzgen. Wén jyabaw, charshenbe küni islamabadtiki asiya ellirining ministirlar yighinida söz qilidu. U, pakistanning lahor shehirini ziyaret qilishi mumkin.

Pakistan xitayning Uyghur musteqilliq herikitini basturushigha hemkarlishiwatqan jenubiy asiyadiki yéqin ittipaqdishi shundaqla xitayning asasliq qoral - yaraq xéridari.

Wén jyabaw pakistandiki ziyaritini bashlashning sel aldida, pakistan déngiz armiyisi xitay bilen 4 dana herbiy paraxot sétiwélish kélishimi imzalighan. Xitaylar pakistanni yadro éléktir istansisi qurush, gwadargha chongqur su portini sélish türlirini öz ichige alghan nechche yüz milyon dollarliq iqtisadi tereqqiyat meblighi bilen teminlimekte. Buninggha kétidighan mebleghning köp qisimini xitay terep üstige alghan. Amma pakistan hökümiti gwadar portining xitay déngiz armiyisining paydilinishigha bérilidighanliqini ret qilmaqta.

Roytérs axbarat'agéntliqining xewer qilishiche, wén jyabaw bu sepiride pakistan bilen 19 türlük kélishim imzalaydiken. (Erkin)