Пакистан билән хитай енергийә вә нефит тәбии газ туруба келишими имзалиди

Пакистан президенти пәрвиз мушәррәп, җуңгониң оттура вә ғәрбий асиядин импорт қилидиған нефитни пакистан арқилиқ уйғур аптоном райониға йәткүзүвелишкә йол беридиғанлиқини билдүрди.

Пакистан вә хитай әмәлдарлириниң пәйшәнбә күни елан қилған баянатида илгири сүрүшичә, икки дөләт енергийә саһәси вә нефит, тәбий газ қезиш, туруба ятқузуш түрлири бойичә һәмкарлиқ келишими имзалиған. Келишим бойичә пакистан оттура вә ғәрбий асияниң мол тәбий газ вә нефитини қандақ қилип пакистан земини арқилиқ уйғур аптоном райони вә хитайға йәткүзүш йоллири үстидә тәтқиқат елип беришкә вәдә қилди.

Франсийә ахбарат агентлиқиниң әскәртишичә, пакистан президенти пәрвиз мушәррәп, "биз енергийә саһәсидики һәмкарлиқимизни болупму нефит әслиһәлири, нефит амбарлири вә тәбий газ турубилирини ятқузуш түрлири бойичә әмилиләштүрүшкә тиришимиз," дәйду. Пәрвиз мушәррәп, келишим имзалаш мурасимида хитай вәкилләр өмикигә пакистанниң хитайни оттура асия вә парис қолтуқидин импорт қилған нефитни тошушқа йол билән тәминләйдиғанлиқини билдүргән. Биз енергийә турубиси вә төмүр йол қуруш арқилиқ икки дөләт иқтисадини туташтуридиған 9 вә 10 - мөҗизини яриталаймиз," дегән. Қара қурум таш йоли қурулғанда пәрвиз мушәррәп буни дунядики 8 - мөҗизә, дегән иди.

Җоңго пакистанни қорал- ярақ билән тәминләйдиған әң чоң дөләт шундақла пакистанниң ядро енергийә истансиси қурушиға ярдәмләшмәктә. Йеқинда америка билән һиндистан арисида имзаланған ядро енергийә келишими исламабад даирилириниң ғәзипини қозғиған иди. (Әркин)