پاكىستان خىتايدىن يادرو رېئاكتور قازىنى سېتىۋېلىش ئۈستىدە سۆھبەت ئېلىپ بارماقتا


2006.01.03
Share on WhatsApp
Share on WhatsApp

ئەنگىلىيىدە چىقىدىغان " پۇل - مۇئامىلە گېزىتى" نىڭ سەيشەنبە كۈنى خەۋەر قىلىشىچە، پاكىستان ھۆكۈمىتى خىتايدىن كۆپ بولغاندا 8 دانە يادرو رېئاكتور قازىنى سېتىۋېلىش مەسىلىسى بويىچە سۆھبەت ئېلىپ بارماقتا. مەزكۇر گېزىتنىڭ ئاشكارىلىشىچە، بۇ سودىنىڭ قىممىتى 7 مىليارد دوللاردىن 10 مىليارد دوللارغىچە يېتىشى مۇمكىن. ئىسمىنى ئاشكارىلاشنى خالىمايدىغان يۇقىرى دەرىجىلىك پاكىستان ئەمەلدارلىرى يادرو رېئاكتور قازىنى قۇرۇلۇشىنىڭ - 2015 يىلى باشلىنىپ 10 يىلدا پۈتىدىغانلىقىنى بىلدۈرگەن.

پاكىستان باش مىنىستىرى شەۋكەت ئەزىزى، ئۆتكەن ھەپتە خىتاي تەرەپنىڭ ياردىمى بىلەن قۇرۇلغان چەشمە يادرو ئىستانسىسىنىڭ ئېچىلىش مۇراسىمىغا ئىشتىراك قىلغان.

پاكىستان ئۆتكەن يىلى 9 - ئايدا ئامېرىكا قاتارلىق غەرب ئەللىرىدىن پاكىستاننىڭ تىنچلىق مەقسەتلىرى ئۈچۈن ئىشلىتىدىغان يادرو تېخنىكىسىنى تەرەققى قىلدۇرۇشىغا ياردەم بېرىشنى تەلەپ قىلغان. ئەمما پاكىستان يادرو پەنلەر ئالىمى ئابدۇلقادىر خاننىڭ 2004 - يىلى ئىران، شىمالىي كورىيە ۋە لىۋىيە قاتارلىق دۆلەتلەرنى يادرو تېخنىكىسى بىلەن تەمىنلەش ۋەقەسىدىن كېيىن، خەلقئارا جەمئىيەت پاكىستان يادرو قۇرۇلۇشىنىڭ بىخەتەرلىكىدىن ئەندىشە قىلىشقا باشلىغان.

پاكىستاننىڭ تۇنجى يادرو ئىستانسىسى 1974 - يىلى كانادانىڭ ياردىمى بىلەن قۇرۇلغان بولسىمۇ، لېكىن غەرب ئەللىرى ئامېرىكىنىڭ بېسىمى ئاستىدا پاكىستان بىلەن يادرو ھەمكارلىقى ئېلىپ بېرىشنى توختاتقان ئىدى. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.