Пакистан хитайдин ядро реактор қазини сетивелиш үстидә сөһбәт елип бармақта

Әнгилийидә чиқидиған " пул - муамилә гезити" ниң сәйшәнбә күни хәвәр қилишичә, пакистан һөкүмити хитайдин көп болғанда 8 данә ядро реактор қазини сетивелиш мәсилиси бойичә сөһбәт елип бармақта. Мәзкур гезитниң ашкарилишичә, бу содиниң қиммити 7 милярд доллардин 10 милярд долларғичә йетиши мумкин. Исмини ашкарилашни халимайдиған юқири дәриҗилик пакистан әмәлдарлири ядро реактор қазини қурулушиниң - 2015 йили башлинип 10 йилда пүтидиғанлиқини билдүргән.

Пакистан баш министири шәвкәт әзизи, өткән һәптә хитай тәрәпниң ярдими билән қурулған чәшмә ядро истансисиниң ечилиш мурасимиға иштирак қилған.

Пакистан өткән йили 9 - айда америка қатарлиқ ғәрб әллиридин пакистанниң тинчлиқ мәқсәтлири үчүн ишлитидиған ядро техникисини тәрәққи қилдурушиға ярдәм беришни тәләп қилған. Әмма пакистан ядро пәнләр алими абдулқадир ханниң 2004 - йили иран, шималий корийә вә ливийә қатарлиқ дөләтләрни ядро техникиси билән тәминләш вәқәсидин кейин, хәлқара җәмийәт пакистан ядро қурулушиниң бихәтәрликидин әндишә қилишқа башлиған.

Пакистанниң тунҗи ядро истансиси 1974 - йили канаданиң ярдими билән қурулған болсиму, лекин ғәрб әллири америкиниң бесими астида пакистан билән ядро һәмкарлиқи елип беришни тохтатқан иди. (Әркин)