Pakistan xitaydin yadro ré'aktor qazini sétiwélish üstide söhbet élip barmaqta

En'giliyide chiqidighan " pul - mu'amile géziti" ning seyshenbe küni xewer qilishiche, pakistan hökümiti xitaydin köp bolghanda 8 dane yadro ré'aktor qazini sétiwélish mesilisi boyiche söhbet élip barmaqta. Mezkur gézitning ashkarilishiche, bu sodining qimmiti 7 milyard dollardin 10 milyard dollarghiche yétishi mumkin. Ismini ashkarilashni xalimaydighan yuqiri derijilik pakistan emeldarliri yadro ré'aktor qazini qurulushining - 2015 yili bashlinip 10 yilda pütidighanliqini bildürgen.

Pakistan bash ministiri shewket ezizi, ötken hepte xitay terepning yardimi bilen qurulghan cheshme yadro istansisining échilish murasimigha ishtirak qilghan.

Pakistan ötken yili 9 - ayda amérika qatarliq gherb elliridin pakistanning tinchliq meqsetliri üchün ishlitidighan yadro téxnikisini tereqqi qildurushigha yardem bérishni telep qilghan. Emma pakistan yadro penler alimi abdulqadir xanning 2004 - yili iran, shimaliy koriye we liwiye qatarliq döletlerni yadro téxnikisi bilen teminlesh weqesidin kéyin, xelq'ara jem'iyet pakistan yadro qurulushining bixeterlikidin endishe qilishqa bashlighan.

Pakistanning tunji yadro istansisi 1974 - yili kanadaning yardimi bilen qurulghan bolsimu, lékin gherb elliri amérikining bésimi astida pakistan bilen yadro hemkarliqi élip bérishni toxtatqan idi. (Erkin)